Zaburi 95

1Njooni, tumwimbie BWANA kwa shangwe na kumpigia kelele za furaha Mwamba anayetuokoa. 2Twende kumlaki kwa shukrani, tumpigie kelele za furaha katika nyimbo zetu. 3Kwa maana BWANA ni Mungu mwenye nguvu, Mfalme mwenye nguvu aliye juu sana ya miungu yote, 4ambaye anashika vilindi vya nchi mkononi mwake; vilele vya milima navyo ni vyake, 5bahari ni mali yake kwa sababu yeye aliifanya, na mikono yake iliifinyanga nchi kavu. 6Njooni, tusujudu mpaka chini na kuinama; tupige magoti mbele za BWANA, yeye aliyetuumba. 7Kwa maana yeye ndiye Mungu wetu, nasi ni watu anaowalisha, kundi analolichunga kwa mkono wake mwenyewe. Laiti leo mngeisikiliza sauti yake! 8“Msiiache mioyo yenu iwe migumu, kama ilivyotokea huko Meriba, siku ile ya Masa kule jangwani, 9wakati babu zenu waliponijaribu na kunipinga, hata baada ya kuiona kazi yangu. 10Miaka arobaini nzima nilichoshwa na kuchukizwa na kizazi kile. Nilisema, ‘Hawa ni watu ambao mioyo yao inatangatanga; hawajapata kamwe kujifunza njia zangu.’ 11Basi katika hasira yangu niliapa: ‘Hawataingia kamwe mahali pangu pa raha.’”