Zaburi 36

1Ndani kabisa ya moyo wangu nasikia jinsi uasi unavyowaambia waovu: hawana hofu ya Mungu mbele ya macho yao. 2Kwa maana wanajipendekeza machoni pao wenyewe kiasi kwamba hawaioni hatia yao na kuichukia. 3Wanayoyasema ni maovu na uongo; wameacha kuwa na hekima na kutenda mema. 4Hata wakiwa wamelala kitandani hupanga maovu; hujiweka katika njia isiyoleta mema, wala hawaachi kamwe yaliyo mabaya. 5BWANA, upendo wako usiokoma unafika mpaka mbinguni, uaminifu wako juu kama mawingu. 6Haki yako imesimama kama milima mikubwa; hukumu zako zina kina kama vilindi vya bahari. BWANA, unawaokoa watu na wanyama pia. 7Mungu, upendo wako usiokoma una thamani kubwa kama nini! Watu wa kila aina hukufanya wewe kuwa kimbilio lao, wakijificha katika kivuli cha mabawa yako. 8Wanashibishwa kwa chakula kizuri cha nyumba yako; unawanywesha kutoka katika kijito cha furaha zako. 9Kwa maana chemchemi ya uzima iko kwako; ni nuru yako inayotuwezesha kuona nuru. 10Endelea kuwaonyesha upendo wako usiokoma wote wanaokujua, na uwaonyeshe haki yako watu wenye mioyo minyofu. 11Usiuache mguu wa wenye kiburi unikanyage, wala mkono wa waovu unisukume mbali. 12Huko watenda mabaya wameanguka; wamepigwa chini wala hawawezi kusimama tena.