Zaburi 51

1Ee Mungu, nifanyie neema kulingana na upendo wako usiokoma; kwa ukuu wa huruma zako, futa matendo yangu ya uasi. 2Nisugue mpaka niwe safi kabisa kutoka hatia yangu, na unisafishe na dhambi yangu. 3Mimi mwenyewe ninayajua matendo yangu ya uasi, na dhambi yangu haiondoki machoni pangu. 4Nimekutendea dhambi wewe, wewe peke yako, na kufanya yale wewe unayoyaona kuwa maovu. Kwa hiyo wewe unaonekana kuwa wa haki katika hukumu yako na safi katika uamuzi wako. 5Kweli, hatia ilikuwa nami nilipozaliwa; dhambi ilikuwepo mama yangu aliponichukua mimba. 6Lakini wewe unatamani kweli ndani kabisa, na katika nafsi yangu ya siri wewe unanijulisha hekima. 7Uiondoe dhambi yangu kwa hisopo, nami nitakuwa safi kabisa; wewe ukinifua, nitakuwa mweupe zaidi ya theluji. 8Yajaze masikio yangu shangwe na furaha; mifupa ambayo wewe uliivunja na icheze. 9Geuza uso wako mbali na dhambi zangu, na ufute hatia yangu yote. 10Ee Mungu, niumbie moyo uliotakasika, na uifanye roho yangu kuwa mpya na imara ndani yangu. 11Usinifukuze mbali na uwepo wako, wala usimwondoe Roho wako Mtakatifu kwangu. 12Nipe tena furaha ya wokovu wako, na unidumishe imara kwa roho iliyo tayari. 13Nitawafundisha waasi mapito yako, na wenye dhambi watarudi nyumbani kwako. 14Ee Mungu, uniokoe na hatia ya damu niliyoimwaga, wewe Mungu unayeniokoa; ndipo ulimi wangu utakapoimba kwa sauti haki yako. 15Ee Bwana, fungua midomo yangu niseme, nami nitazitangaza sifa zako. 16Si dhabihu wewe unayoitaka, la sivyo ningeitoa; sadaka ya kuteketezwa haikupendezi. 17Dhabihu ambazo Mungu anazikubali ni roho iliyopondeka. Moyo uliovunjika na kupondwa, Ee Mungu, wewe hutaukataa kamwe. 18Kwa nia yako njema uwe mwema kwa Sayuni, na uziinue kuta za Yerusalemu. 19Hapo wewe utazikaribisha dhabihu zinazotolewa kwa haki, sadaka za kuteketezwa na sadaka kamili; hapo ndama dume watapandishwa juu ya madhabahu yako.