Zaburi 27

1Ya Daudi. BWANA ni nuru yangu, ndiye anayeniokoa; yuko nani wa kunitisha? BWANA ni ngome inayoulinda uhai wangu; ni nani awezaye kunitetemesha? 2Watu wabaya waliponizunguka ili kunirarua nyama, watesi wangu na adui zangu, wao wenyewe walijikwaa wakaanguka chini. 3Jeshi likipiga kambi kunizunguka, moyo wangu hautaogopa; vita vikizuka dhidi yangu, bado nitaendelea kutumaini. 4Nimemwomba BWANA jambo moja, nalo ndilo ninalolitafuta: kuishi katika nyumba ya BWANA maisha yangu yote, kuutazama upendezo wa BWANA na kumtafuta yeye katika hekalu lake. 5Siku ya taabu itakapofika, atanihifadhi katika makao yake, atanificha ndani kabisa ya hema lake, na kuniweka juu ya mwamba nisipoweza kufikiwa. 6Basi sasa nitakiinua kichwa changu juu ya adui wanaonizunguka; katika hema lake nitatoa dhabihu kwa kelele za shangwe, nami nitamwimbia BWANA na kumpigia muziki. 7BWANA, usikilize ninapokulilia; unionyeshe neema na unijibu. 8Moyo wangu unakuambia yale uliyoyasema: “Utafuteni uso wangu.” Basi nitautafuta uso wako, BWANA. 9Usiugeuze uso wako mbali nami, wala usimfukuze mtumishi wako kwa hasira. Wewe umekuwa msaada wangu siku zote; usiniachilie wala usiniache, Ee Mungu unayeniokoa. 10Hata kama baba yangu na mama yangu wangeniacha, BWANA angenikaribisha. 11BWANA, unifundishe njia yako; uniongoze katika njia laini, kwa maana kuna adui wanaonitazama. 12Usinikabidhi kwa matakwa ya adui zangu, kwa maana mashahidi waongo wamesimama dhidi yangu, watu wanaopumua ukatili. 13Kama nisingeamini kwamba nitauona wema wa BWANA nikiwa bado kati ya walio hai, ningekuwa wapi? 14Endelea kumngojea BWANA. Simama imara, uwe na moyo shujaa. Naam, mngojee BWANA.