Zaburi 105

1Mshukuruni BWANA, liitieni jina lake; waambieni mataifa yote aliyoyatenda. 2Mwimbieni, pigeni vinanda mkimsifu; zungumzeni mambo yote ya ajabu aliyoyatenda. 3Oneni fahari katika jina lake takatifu; wote wanaomtafuta BWANA wafurahi mioyoni mwao. 4Mgeukieni BWANA na nguvu zake; njooni mbele zake tena na tena. 5Yakumbukeni maajabu aliyoyafanya, ishara zake, na hukumu alizozitamka, 6ninyi wazao wa mtumishi wake Abrahamu, ninyi watoto wa Yakobo, aliowachagua. 7Yeye, BWANA, ndiye Mungu wetu; maamuzi yake yanaifikia dunia yote. 8Analiweka agano lake moyoni milele, ahadi aliyoiweka kwa vizazi elfu, 9agano alilofanya na Abrahamu, kiapo alichomwapia Isaka, 10naye akaliweka imara kwa Yakobo kuwa agizo, kwa Israeli kuwa agano linalodumu milele, 11akisema, “Nchi ya Kanaani nakupa wewe, fungu lililopimiwa ninyi kuwa urithi wenu.” 12Walipokuwa kikundi kidogo tu cha watu, wageni wachache walioishi katika nchi ile, 13wakitangatanga kutoka taifa moja hadi jingine, kutoka ufalme mmoja hadi kwa watu wengine, 14hakumwacha mtu yeyote awadhulumu, na kwa ajili yao akawakaripia wafalme: 15“Msinyooshe mkono juu ya wapakwa mafuta wangu; msiwaumize manabii wangu.” 16Aliita njaa iijie nchi, akaondoa kila akiba ya chakula. 17Lakini alikuwa amekwisha kumtuma mtu awatangulie: Yusufu, aliyeuzwa awe mtumwa. 18Pingu ziliichubua miguu yake, na shingo yake ilifungwa kwa chuma, 19mpaka siku maneno yake yenyewe yalipotimia; neno la BWANA lilimsafisha. 20Mfalme alituma watu wamfungue; mtawala wa mataifa mengi akamwachilia. 21Alimweka kuwa msimamizi wa jumba lake la kifalme, akampa mamlaka juu ya mali yake yote, 22akiwa na mamlaka ya kuwatia maafisa wake minyororo akipenda, na kuwafundisha washauri wake hekima. 23Ndipo Israeli akaingia Misri, na Yakobo akakaa kama mgeni katika nchi ya Hamu. 24Huko aliwafanya watu wake waongezeke sana kwa idadi, hata wakawa na nguvu kuliko adui zao. 25Aliigeuza mioyo ya Wamisri wawachukie watu wake na kuwafanyia hila watumishi wake. 26Alimtuma mtumishi wake Musa, na pamoja naye Haruni, mteule wake. 27Kati ya Wamisri walizifanya ishara alizokuwa amezisema, na maajabu katika nchi yote ya Hamu. 28Alituma giza, nchi ikawa na giza; nao hawakulipinga neno lake. 29Aliyafanya maji yao kuwa damu, akawaacha samaki wao wamekufa. 30Vyura walijaa katika nchi yao, hata ndani ya vyumba vya ndani vya wafalme wao. 31Kwa amri yake yalikuja makundi ya inzi, na mbu wakaenea kila sehemu ya nchi yao. 32Badala ya mvua aliwapa mvua ya mawe, na moto ukimulika katika nchi yao yote. 33Aliiangusha mizabibu yao na mitini yao, akaivunjavunja miti yote ya nchi yao. 34Kwa neno lake nzige walifika, makundi ya tunutu wasiohesabika, 35nao wakala kila mmea wa kijani katika nchi yao, wakayameza mavuno ya mashamba yao. 36Naye akamwua mzaliwa wa kwanza wa kila familia katika nchi yao, wana wa kwanza waliozaliwa kwa nguvu zao. 37Aliwatoa watu wake wakiwa wamebeba fedha na dhahabu, na katika makabila yake yote hakuna hata mtu mmoja aliyejikwaa. 38Misri ilifurahi kuwaona wakiondoka, kwa kuwa watu wake walikuwa wameingiwa na hofu yao. 39Alitandaza wingu juu yao kama pazia la kuwakinga, na moto wa kuangaza usiku. 40Walipoomba, aliwaletea kware, akawashibisha kwa mkate kutoka mbinguni. 41Aliupasua mwamba, maji yakatiririka, yakipita katika nchi kavu kama mto. 42Kwa maana alilikumbuka neno takatifu alilomwambia Abrahamu, mtumishi wake. 43Hivyo akawaongoza watu wake watoke wakishangilia, wateule wake wakiimba kwa sauti kuu kwa furaha. 44Aliwapa nchi za mataifa mengine, nao wakachukua kile ambacho watu hao walikuwa wamekifanyia kazi, 45ili wazishike kanuni zake na kuyafuata maelekezo yake kwa uaminifu. Msifuni BWANA!