Zaburi 132

1Wimbo wa kupanda. Ee BWANA, umkumbuke Daudi na taabu zote alizozipitia, 2jinsi alivyokula kiapo kwa BWANA na kuweka nadhiri kwa Mwenye Nguvu wa Yakobo, 3“Sitakanyaga ndani ya nyumba yangu mwenyewe wala kupanda kitandani mwangu, 4sitayaacha macho yangu yalale wala kope zangu zifumbe, 5mpaka nimepata mahali pa BWANA kukaa, makao ya Mwenye Nguvu wa Yakobo.” 6Sikilizeni! Tulisikia habari zake huko Efrata, tukalikuta katika mashamba ya Yaari. 7Njooni, tuingie nyumbani mwake tukasujudu mbele ya kiti cha kuwekea miguu yake. 8Inuka, Ee BWANA! Uje mahali utakapopumzika, wewe na sanduku la uweza wako. 9Makuhani wako na wavae haki, na wale walio waaminifu kwako walie kwa furaha. 10Kwa ajili ya Daudi mtumishi wako, usimkatae mfalme uliyemtia mafuta. 11BWANA amempa Daudi neno lake kwa kiapo, neno la kweli ambalo hatalirudisha kamwe: “Nitamweka mtoto wa uzao wako mwenyewe katika kiti chako cha enzi. 12Wana wako wakiwa waaminifu kwa agano langu na kwa maagizo nitakayowafundisha, wana wao nao wataketi katika kiti chako cha enzi nyakati zote.” 13Kwa maana BWANA aliichagua Sayuni; alitamani kuifanya makao yake. 14“Hapa ndipo mahali pa pumziko langu nyakati zote; nitaishi hapa, kwa maana ndipo nilipotamani. 15Nitaibariki sana akiba ya chakula ya mji huu; nitawapa maskini wake mkate wote wanaohitaji. 16Nitawavika makuhani wake wokovu, na watu wake waaminifu watapiga kelele na kuimba kwa furaha. 17Huko nitaifanya pembe ya Daudi ichipuke; nimemwandalia taa mfalme wangu niliyemtia mafuta. 18Nitawavika adui zake aibu, lakini taji iliyo kichwani pake itametameta.”