Zaburi 30

¹Nitakutukuza wewe, Ee Bwana, kwa kuwa umeniinua kutoka vilindi, na hukuacha adui zangu washangilie juu yangu.

²Ee Bwana, Mungu wangu, nilikuita unisaidie na wewe umeniponya.

³Ee Bwana, umenitoa Kuzimu, umeniokoa nisishuke kwenye shimo la mauti.

⁴Mwimbieni Bwana, enyi watakatifu wake; lisifuni jina lake takatifu.

⁵Kwa maana hasira yake ni ya muda mfupi, bali upendo wake hudumu siku zote. Inawezekana kilio kiwepo usiku kucha, lakini asubuhi kukawa na furaha.

⁶Nilipofanikiwa nilisema, “Sitatikiswa kamwe.”

⁷Ee Bwana, uliponijalia, uliuimarisha mlima wangu, lakini ulipouficha uso wako nilifadhaika.

⁸Kwako wewe, Ee Bwana, niliita, kwa Bwana niliomba rehema:

⁹“Kuna faida gani katika kuangamia kwangu? Katika kushuka kwangu shimoni? Je, mavumbi yatakusifu? Je, yatatangaza uaminifu wako?

¹⁰Ee Bwana, unisikie na kunihurumia, Ee Bwana, uwe msaada wangu.”

¹¹Uligeuza maombolezo yangu kuwa kucheza, ulinivua nguo za gunia ukanivika shangwe,

¹²ili moyo wangu uweze kukusifu na usikae kimya. Ee Bwana Mungu wangu, nitakushukuru milele.