Zaburi 135

1Msifuni BWANA! Lisifuni jina la BWANA; mpeni sifa, enyi watumishi wa BWANA, 2mnaosimama katika nyumba ya BWANA, katika viwanja vya nyumba ya Mungu wetu. 3Msifuni BWANA, kwa maana BWANA ni mwema; pigeni muziki kwa jina lake, kwa maana hilo ni furaha. 4Kwa maana BWANA alimchagua Yakobo kuwa wake mwenyewe, Israeli kuwa hazina yake maalum. 5Nina hakika nalo: BWANA ni mkuu, na Bwana wetu yuko juu ya miungu yote. 6Lolote ambalo BWANA anachagua kufanya, hulifanya, mbinguni, duniani, baharini na katika vilindi vyote vya bahari. 7Huyainua mawingu kutoka miisho ya dunia; hufanya umeme umulike pamoja na mvua na kuutoa upepo katika ghala zake. 8Aliwapiga wazaliwa wa kwanza wa Misri, wa watu na wa wanyama pia. 9Katikati yako kabisa, Ee Misri, alituma ishara na maajabu, dhidi ya Farao na maafisa wake wote. 10Aliyapiga mataifa mengi na kuwaua wafalme wenye nguvu, 11Sihoni mfalme wa Waamori, Ogu mfalme wa Bashani, na falme zote za Kanaani, 12na akaitoa nchi yao kuwa urithi, urithi kwa watu wake Israeli. 13Ee BWANA, jina lako litadumu milele; Ee BWANA, watu watakukumbuka katika kila kizazi. 14Kwa maana BWANA atawatetea watu wake na kuwaonea huruma watumishi wake. 15Sanamu za mataifa zimeundwa kwa fedha na dhahabu, zimefanyizwa kwa mikono ya binadamu. 16Zina kinywa, lakini hazitamki neno; zina macho, lakini hazioni kitu. 17Zina masikio, lakini hazisikii kitu; hata pumzi haimo vinywani mwao. 18Watu wanaozitengeneza wataishia kuwa kama hizo, vivyo hivyo kila anayezitegemea. 19Enyi watu wa Israeli, mbarikini BWANA! Enyi jamaa ya Haruni, mbarikini BWANA! 20Enyi jamaa ya Lawi, mbarikini BWANA! Ninyi nyote mnaomcha BWANA, mbarikini BWANA! 21BWANA na abarikiwe kutoka Sayuni, yeye anayeishi Yerusalemu. Msifuni BWANA!