Zaburi 72

1Ya Sulemani. Ee Mungu, umjalie mfalme hukumu zako za haki, na mwana wa mfalme haki yako. 2Na awaongoze watu wako kwa haki, na maskini wako kwa usawa. 3Milima na iwatolee watu ustawi, na vilima viulete kwa haki. 4Na awatetee maskini kati ya watu, na kuziokoa jamaa za wahitaji; na amvunjevunje mdhalimu. 5Watu na wakuche wewe maadamu kuna jua na mwezi, tangu kizazi hata kizazi. 6Na awe kama mvua inayonyesha juu ya shamba lililokatwa majani, kama manyunyu yanayoilowesha nchi. 7Katika siku zake wenye haki na wastawi, na amani ifurike mpaka mwezi utakapotoweka. 8Utawala wake na uenee kutoka bahari hata bahari, kutoka Mto hata miisho ya mbali ya dunia. 9Wahamaji wa jangwani na wapige magoti mbele yake, na adui zake waramba mavumbi. 10Tarshishi na visiwa na watume wafalme wao na kodi; wafalme wa Sheba na Seba na wamletee zawadi. 11Kila mfalme na ainame mbele yake, na kila taifa liwe mtumishi wake. 12Kwa maana huwaokoa wahitaji wanapolia, na maskini wasio na mtu mwingine wa kuwasaidia. 13Huwaonea huruma wanyonge na wahitaji, naye huyaokoa maisha ya walio na mahitaji. 14Huwaweka huru kutoka katika ukatili na jeuri; maisha yao yana thamani kubwa machoni pake. 15Mfalme na aishi! Na apokee dhahabu ya Sheba; maombi na yafanywe kwa ajili yake daima, na baraka iombwe kwa ajili yake mchana kutwa. 16Nafaka na iote kwa wingi katika nchi yote, hata juu ya vilima; mavuno yake na yavume kama miti ya Lebanoni, na watu wa mjini wachipuke kama majani mashambani. 17Jina lake na lidumu milele, sifa zake zienee maadamu jua linang’aa. Mataifa yote na yaombe kubarikiwa kama yeye alivyobarikiwa, na kumwita mwenye heri. 18Na abarikiwe BWANA Mungu, Mungu wa Israeli; yeye peke yake hutenda maajabu. 19Jina lake tukufu na libarikiwe siku zote; utukufu wake na uijaze dunia yote. Amina na Amina. 20Hapa zinaishia sala za Daudi mwana wa Yese.