Zaburi 38

¹Ee Bwana, usinikemee katika hasira yako, wala kuniadhibu katika ghadhabu yako.

²Kwa kuwa mishale yako imenichoma, na mkono wako umenishukia.

³Hakuna afya mwilini mwangu kwa sababu ya ghadhabu yako, mifupa yangu haina uzima kwa sababu ya dhambi zangu.

⁴Maovu yangu yamenifunika kama mzigo usiochukulika.

⁵Majeraha yangu yameoza na yananuka, kwa sababu ya upumbavu wa dhambi zangu.

⁶Nimeinamishwa chini na kushushwa sana, mchana kutwa nazunguka nikiomboleza.

⁷Viuno vyangu vimejaa maumivu yaunguzayo, hakuna afya mwilini mwangu.

⁸Nimedhoofika na kupondwa kabisa, nasononeka kwa maumivu makuu ya moyoni.

⁹Ee Bwana, yote ninayoyaonea shauku yako wazi mbele zako, kutamani kwangu sana hakufichiki mbele zako.

¹⁰Moyo wangu unapigapiga, nguvu zangu zimeniishia; hata macho yangu yametiwa giza.

¹¹Rafiki na wenzangu wananikwepa kwa sababu ya majeraha yangu; majirani zangu wanakaa mbali nami.

¹²Wale wanaotafuta uhai wangu wanatega mitego yao, wale ambao wangetaka kunidhuru huongea juu ya maangamizi yangu; hufanya shauri la hila mchana kutwa.

¹³Mimi ni kama mtu kiziwi, asiyeweza kusikia, ni kama bubu, asiyeweza kufungua kinywa chake,

¹⁴nimekuwa kama mtu asiyesikia, ambaye kinywa chake hakiwezi kutoa jibu.

¹⁵Ee Bwana, ninakungojea wewe, Ee Bwana Mungu wangu, utajibu.

¹⁶Kwa kuwa nilisema, “Usiwaache wafurahie, wala wasijitukuze juu yangu mguu wangu unapoteleza.”

¹⁷Kwa maana ninakaribia kuanguka, na maumivu yangu yananiandama siku zote.

¹⁸Naungama uovu wangu, ninataabishwa na dhambi yangu.

¹⁹Wengi ni wale ambao ni adui zangu hodari, wale wanaonichukia bila sababu ni wengi.

²⁰Wanaolipa maovu kwa wema wangu hunisingizia ninapofuata lililo jema.

²¹Ee Bwana, usiniache, usiwe mbali nami, Ee Mungu wangu.

²²Ee Bwana Mwokozi wangu, uje upesi kunisaidia.