Zaburi 18

1Alisema: “Ninakupenda, Ee BWANA, nguvu yangu. 2BWANA ni jabali langu, ngome yangu, yule anayeniweka huru; Mungu wangu ni mwamba wangu, nami ninajificha kwake. Yeye ni ngao yangu, wokovu wangu wenye nguvu, mnara wangu juu milimani. 3Ninamwita BWANA, anayestahili kusifiwa, nami ninaokolewa kutoka kwa adui zangu. 4Kamba za kifo zilinifunga pande zote; mafuriko ya uharibifu yalinilemea kwa hofu. 5Kamba za Kuzimu zilinizingira; mitego ya kifo ilikuwa mbele yangu kabisa. 6Nilipobanwa sana nilimwita BWANA na kumlilia Mungu wangu. Kutoka hekaluni mwake aliisikiliza sauti yangu; kilio changu kilifika mbele yake na kuingia masikioni mwake. 7Kisha dunia ikatetemeka na kuyumba; mizizi ya milima ikatetemeka na kutikiswa, kwa sababu alikuwa amekasirika sana. 8Moshi ulipanda kutoka puani mwake, na moto unaoteketeza ukatoka kinywani mwake; makaa yanayowaka yakatoka ndani yake. 9Aliziinamisha mbingu chini akashuka; mawingu meusi ya dhoruba yalikuwa chini ya miguu yake. 10Akiwa amepanda kerubi, aliruka; alishuka kwa kasi juu ya mabawa ya upepo. 11Alijifunika gizani na kujificha ndani yake; pande zote zake palikuwa na hema la mawingu meusi ya mvua, mawingu mazito ya anga. 12Kutoka katika mwangaza ulio mbele yake mawingu yake yalipasuka, pamoja na mvua ya mawe na makaa yanayowaka. 13BWANA alinguruma mbinguni; Aliye Juu Kabisa alipaza sauti yake, pamoja na mvua ya mawe na makaa yanayowaka. 14Aliiachilia mishale yake akawatawanya adui; alivurumisha radi akawachanganya. 15Vitanda vya bahari vikaonekana, na misingi ya dunia ikawa wazi kwa karipio lako, Ee BWANA, kwa mvumo wa pumzi kutoka puani mwako. 16Kutoka juu alinyoosha mkono wake akanishika; akanivuta kutoka katika maji makuu. 17Alininyakua kutoka kwa adui yangu mwenye nguvu, kutoka kwa wale walionichukia, kwa sababu walinizidi nguvu. 18Walinijia siku ya msiba wangu, lakini BWANA alinishika. 19Aliniongoza nje mpaka nchi iliyo wazi; aliniweka huru, kwa sababu alipendezwa nami. 20BWANA alinitendea kama mwenendo wangu wa haki ulivyostahili; alinilipa kwa sababu mikono yangu ilikuwa safi. 21Kwa maana nimeenenda katika njia za BWANA wala sikumwacha Mungu wangu ili kutenda mabaya. 22Maamuzi yake yote yamekuwa mbele yangu; sikuzisukuma kando sheria zake. 23Nilikuwa mwaminifu kwake kwa moyo wote; nilijilinda nisitende dhambi. 24Kwa hiyo BWANA alinilipa kwa kutenda haki, kwa mikono safi aliyoiona. 25Kwa waaminifu wewe ni mwaminifu; kwa wenye unyofu unaonyesha unyofu. 26Kwa walio safi unajithibitisha kuwa safi, lakini kwa wapotovu unatenda kwa werevu. 27Unawaokoa watu walionyenyekezwa, lakini macho ya kiburi unayashusha chini. 28Unaifanya taa yangu iwake; BWANA Mungu wangu analiangaza giza langu. 29Pamoja nawe ninaweza kukivamia kikosi cha askari; kwa nguvu za Mungu wangu ninaweza kuruka ukuta. 30Huyu ndiye Mungu: njia yake haina dosari; neno la BWANA limejaribiwa na ni la kweli; yeye ni ngao kwa wote wanaomfanya kuwa kimbilio lao. 31Je, yuko Mungu mwingine ila BWANA? Je, upo mwamba mwingine ila Mungu wetu? 32Mungu anayenifunga nguvu kiunoni kama mshipi na kuifanya njia yangu iwe salama, 33anayeifanya miguu yangu kuwa imara kama ya ayala na kunisimamisha imara juu ya vilele, 34anayeifundisha mikono yangu vita, hata mikono yangu inaweza kuuvuta upinde wa shaba. 35Umenikabidhi ngao yako ya wokovu; mkono wako wa kuume unanishika, na kuinama kwako kunijia kumenifanya mkuu. 36Unazipa hatua zangu nafasi, hivyo vifundo vyangu havigeuki. 37Niliwafukuza adui zangu nikawakamata; sikuacha kuwafuatia mpaka nilipowamaliza. 38Niliwavunjavunja, nao hawakuweza kusimama tena; walilala wameanguka miguuni pangu. 39Ulinifunga nguvu kwa ajili ya mapigano; uliwapigisha magoti chini yangu washambuliaji wangu. 40Uliwafanya adui zangu wanikimbie, nami nikawaangamiza wale walionichukia. 41Waliita msaada, lakini hakuna aliyekuja kuwaokoa; walimlilia BWANA, lakini hakuwapa jibu. 42Niliwasaga laini kama mavumbi yanayopeperushwa na upepo; niliwatupa nje kama matope barabarani. 43Uliniweka huru kutoka katika ugomvi wa watu; uliniweka kuwa kiongozi wa mataifa. Taifa ambalo sikulijua sasa linanitumikia. 44Mara wanaposikia, wananitii; wageni wananijia wakinyenyekea kwa woga. 45Wageni wanakata tamaa; wanatoka katika ngome zao wakitetemeka. 46BWANA yu hai! Mwamba wangu na abarikiwe! Mungu anayeniokoa na ainuliwe juu, 47Mungu anayenilipizia kisasi na kuyaweka mataifa chini ya utawala wangu, 48anayeniokoa kutoka kwa adui zangu. Unaniinua juu ya washambuliaji wangu; unaniokoa kutoka kwa mtu mwenye jeuri. 49Ndiyo maana nitakushukuru kati ya mataifa, Ee BWANA, na kuliimbia sifa jina lako. 50Ni mkuu ushindi anaompa mfalme wake; anaonyesha upendo usiokoma kwa yule aliyempaka mafuta, kwa Daudi na uzao wake nyakati zote.”