Zaburi 63

¹Ee Mungu, wewe ni Mungu wangu, nakutafuta kwa moyo wote; nafsi yangu inakuonea kiu, mwili wangu unakuonea wewe shauku, katika nchi kame na iliyochoka mahali ambapo hapana maji.

²Nimekuona katika mahali patakatifu na kuuona uwezo wako na utukufu wako.

³Kwa sababu upendo wako ni bora kuliko uhai, midomo yangu itakuadhimisha.

⁴Nitakusifu siku zote za maisha yangu, na kwa jina lako nitainua mikono yangu.

⁵Nafsi yangu itatoshelezwa kama kwa wingi wa vyakula; kwa midomo iimbayo kinywa changu kitakusifu wewe.

⁶Kitandani mwangu ninakukumbuka wewe, ninawaza juu yako makesha yote ya usiku.

⁷Kwa sababu wewe ndiwe msaada wangu, chini ya uvuli wa mbawa zako naimba.

⁸Nafsi yangu inaambatana nawe, mkono wako wa kuume hunishika.

⁹Wale wanaotafuta uhai wangu wataharibiwa, watakwenda chini kwenye vilindi vya dunia.

¹⁰Watatolewa wafe kwa upanga, nao watakuwa chakula cha mbweha.

¹¹Bali mfalme atafurahi katika Mungu, wale wote waapao kwa jina la Mungu watamsifu, bali vinywa vya waongo vitanyamazishwa.