Zaburi 79

1Zaburi ya Asafu. Ee Mungu, mataifa yamevamia nchi iliyo mali yako; wamelinajisi hekalu lako takatifu na kuigeuza Yerusalemu kuwa marundo ya kifusi. 2Wameitupa miili ya watumishi wako ili ndege wa angani waile, na nyama ya watu wako waaminifu kwa wanyama wa porini. 3Wameimwaga damu yao kama maji kila upande wa Yerusalemu, wala hakubaki mtu wa kuwazika. 4Tumekuwa fedheha machoni pa jirani zetu, tukichekwa na kudharauliwa na wote walio karibu nasi. 5Mpaka lini, BWANA? Je, utakasirika bila mwisho? Je, wivu wako utaendelea kuwaka kama moto? 6Imwage hasira yako kali juu ya mataifa ambayo hayajakujua wewe, juu ya falme zisizoliitia jina lako kamwe, 7kwa maana wamemmeza Yakobo na kuiacha nchi yake ikiwa ukiwa. 8Usituhesabie makosa ya wale waliotutangulia; huruma zako na ziharakishe kutulaki, kwa maana nguvu zetu zimekwisha kabisa. 9Ee Mungu unayetuokoa, uje utusaidie kwa ajili ya utukufu wa jina lako. Utuokoe na kuzifunika dhambi zetu, kwa heshima ya jina lako. 10Kwa nini mataifa wapate kusema, “Yuko wapi Mungu wao?” Mataifa na wakuone wewe ukilipiza damu ya watumishi wako iliyomwagwa, nasi tuone kwa macho yetu wenyewe. 11Kuugua kwa mateka na kukufikie wewe; kwa uweza wa mkono wako, uwaepushe wale waliohukumiwa kufa. 12Uwalipe jirani zetu mara saba, moja kwa moja vifuani mwao, kwa dharau waliyokurundikia wewe, Ee Bwana. 13Ndipo sisi, watu wako, kundi unalolichunga wewe, tutakushukuru siku zote; kwa kila kizazi tutasimulia sifa zako.