Zaburi 69

1Ee Mungu, uniokoe, kwa maana maji yamepanda mpaka kooni mwangu. 2Ninazama katika matope mazito, bila kitu cha kusimamia; nimeshuka katika maji ya kina, na mkondo unanichukua. 3Nimechoka kwa kuita; koo langu linawaka kwa ukavu. Macho yangu yamefifia kwa kumtazamia Mungu wangu. 4Watu wanaonichukia bila sababu ni wengi kuliko nywele za kichwa changu; wana nguvu wale wanaotafuta kuniangamiza, adui zangu waongo. Je, nilipe kile ambacho sikuchukua kamwe? 5Ee Mungu, wewe unajua upumbavu wangu; hakuna hatia yangu yoyote iliyofichika kwako. 6Mtu yeyote akungojeaye asiaibishwe kwa ajili yangu, Bwana MUNGU wa majeshi; mtu yeyote akutafutaye asifedheheshwe kwa ajili yangu, Ee Mungu wa Israeli. 7Kwa sababu yako nimebeba dharau; fedheha inaufunika uso wangu. 8Ndugu zangu wenyewe hunitendea kama mgeni; kwa wana wa mama yangu mimi ni mtu wa nje. 9Shauku ya nyumba yako inaniteketeza, na dhihaka walizokuelekezea zimenipata mimi. 10Nililia na kukaa bila kula, nao wakanidhihaki kwa ajili ya hilo. 11Nilipovaa gunia kama nguo, walinifanya kuwa kichekesho cha misemo yao. 12Watu waketio kwenye lango la mji hunisengenya, na walevi huimba nyimbo za kunidhihaki. 13Lakini mimi, ninakuomba wewe, BWANA, wakati utakaoukubali; Ee Mungu, kwa upendo wako mkuu usiokoma, unijibu kwa uokoaji wako wa uaminifu. 14Unitoe katika matope, wala usiniache nizame; niponywe kutoka kwa wale wanaonichukia, nitoke katika maji ya kina. 15Usiache mafuriko ya maji yanifunike, wala kilindi kinimeze, wala shimo linifungie kinywa chake. 16Unijibu, BWANA, kwa sababu upendo wako usiokoma ni mwema; kwa huruma zako nyingi, unigeukie. 17Usinigeuzie mgongo, mimi mtumishi wako; nimesongwa sana, basi uharakishe kunijibu. 18Uje karibu nami, unikomboe; uniweke huru kwa sababu ya adui zangu. 19Wewe unajua dharau ninayobeba, aibu yangu na fedheha yangu; kila mmoja wa adui zangu yuko mbele ya macho yako. 20Dharau imeuvunja moyo wangu, ikaniacha mgonjwa; nilitumaini mtu angenionea huruma, lakini hakuna aliyefanya hivyo, kwamba mtu angenifariji, lakini hakuonekana yeyote. 21Waliweka sumu chungu katika chakula changu, na nilipokuwa na kiu walinipa divai iliyochacha. 22Chakula kilichowekwa mbele yao na kiwe mtego kwao, tanzi wakati wanapojiona salama. 23Macho yao na yafifie hata wasiweze kuona; uifanye miili yao itetemeke bila kikomo. 24Mwaga hasira yako kali juu yao; hasira yako inayowaka iwafikie. 25Kambi yao na iwe jangwa, pasiwe na mtu yeyote anayeishi katika hema zao. 26Kwa maana wanamwandama yule uliyempiga wewe, na kusengenya juu ya maumivu ya watu uliowajeruhi wewe. 27Ongeza hatia juu ya hatia yao; wasipate sehemu katika haki yako iokoayo. 28Majina yao na yafutwe katika kitabu cha uzima, wasiandikwe kamwe pamoja na wenye haki. 29Lakini mimi ni maskini na ninaumia; msaada wako wa kuokoa, Ee Mungu, uniinue mpaka mahali salama. 30Kwa wimbo nitalisifu jina la Mungu, na kutangaza ukuu wake kwa shukrani. 31Hilo litampendeza BWANA kuliko ng’ombe, au fahali mchanga mwenye pembe zilizokomaa na kwato. 32Wanyenyekevu wataona na kufurahi; ninyi mmtafutao Mungu, jipeni moyo mkaishi! 33Kwa maana BWANA huwasikia maskini, wala hawadharau watu wake walio katika minyororo. 34Mbingu na nchi na zimsifu, bahari na vyote vinavyoogelea ndani yake. 35Kwa maana Mungu ataiokoa Sayuni na kuijenga upya miji ya Yuda; watu wake wataishi huko na kuimiliki kuwa yao, 36wazao wa watumishi wake wataipokea kuwa urithi wao, na wote walipendao jina lake watafanya makao yao humo.