Zaburi 80

1Utege sikio lako kwetu, Ee Mchungaji wa Israeli, unayemwongoza Yusufu kama kundi! Wewe uliyeketi juu ya makerubi, ung’ae kwa fahari! 2Mbele ya Efraimu, Benyamini na Manase, uziamshe nguvu zako uje kutuokoa! 3Ee Mungu, uturudishe! Utuangazie nuru ya uso wako, nasi tutaokolewa. 4Ee BWANA Mungu wa majeshi, mpaka lini utawaka hasira hata watu wako wanapoomba? 5Umeyafanya machozi kuwa chakula chao, na kuwapa vipimo vizima vya machozi wanywe. 6Unatufanya kitu ambacho jirani zetu wanakigombania, na adui zetu hutudharau kati yao wenyewe. 7Ee Mungu wa majeshi, uturudishe! Utuangazie nuru ya uso wako, nasi tutaokolewa. 8Uliutoa mzabibu katika Misri; wewe uliyafukuza mataifa ili uupande. 9Uliitayarisha ardhi kuupokea; uliotesha mizizi yake na kuifunika nchi. 10Kivuli chake kilienea juu ya milima, na matawi yake juu ya mierezi mikubwa. 11Ulinyoosha matawi yake mpaka baharini, na machipukizi yake mpaka Mto. 12Kwa nini wewe ulizibomoa kuta zinazouzunguka? Sasa kila apitaye njiani huchuma zabibu zake. 13Nguruwe mwitu kutoka msituni huung’oa, na viumbe wa nyika hujilisha humo. 14Ee Mungu wa majeshi, tafadhali urudi! Utazame chini kutoka mbinguni uone; uutunze mzabibu huu, 15shina lililopandwa na mkono wako wa kuume, mwana uliyemkuza kwa nguvu kwa ajili yako mwenyewe. 16Umechomwa kwa moto na kukatwa; watu wako wanakufa chini ya kemeo lako la hasira. 17Mkono wako na umlinde mtu aliye mkono wako wa kuume, mwanadamu uliyemkuza kwa nguvu kwa ajili yako mwenyewe. 18Ndipo hatutakuacha wewe. Uturudishie uhai, nasi tutakuita kwa jina lako. 19Ee BWANA Mungu wa majeshi, uturudishe! Utuangazie nuru ya uso wako, nasi tutaokolewa.