Zaburi 147

¹Msifuni Bwana. Tazama jinsi ilivyo vyema kumwimbia Mungu wetu sifa, jinsi inavyopendeza na kustahili kumsifu yeye!

²Bwana hujenga Yerusalemu, huwakusanya Israeli walio uhamishoni.

³Anawaponya waliovunjika mioyo na kuvifunga vidonda vyao.

⁴Huzihesabu nyota na huipa kila moja jina lake.

⁵Bwana wetu ni mkuu na mwenye uwezo mwingi, ufahamu wake hauna kikomo.

⁶Bwana huwahifadhi wanyenyekevu lakini huwashusha waovu mpaka mavumbini.

⁷Mwimbieni Bwana kwa shukrani, mpigieni Mungu wetu kinubi.

⁸Yeye huzifunika anga kwa mawingu, huinyeshea ardhi mvua, na kuzifanya nyasi kuota juu ya vilima.

⁹Huwapa chakula mifugo na pia makinda ya kunguru yanapolia.

¹⁰Furaha yake haipo katika nguvu za farasi, wala furaha yake kwenye miguu ya mwanadamu.

¹¹Bwana hupendezwa na wale wamchao, wale wanaoweka tumaini lao katika upendo wake usiokoma.

¹²Mtukuze Bwana, ee Yerusalemu, msifu Mungu wako, ee Sayuni,

¹³kwa maana huimarisha makomeo ya malango yako na huwabariki watu wako walio ndani yako.

¹⁴Huwapa amani mipakani mwenu na kukushibisha kwa ngano safi kabisa.

¹⁵Hutuma amri yake duniani, neno lake hukimbia kasi.

¹⁶Anatandaza theluji kama sufu na kutawanya umande kama majivu.

¹⁷Huvurumisha mvua yake ya mawe kama changarawe. Ni nani awezaye kustahimili ukali wa baridi yake?

¹⁸Hutuma neno lake na kuviyeyusha, huvumisha upepo wake, nayo maji hutiririka.

¹⁹Amemfunulia Yakobo neno lake, sheria zake na maagizo yake kwa Israeli.

²⁰Hajafanya hivyo kwa taifa lingine lolote, hawazijui sheria zake. Msifuni Bwana.