Zaburi 94

1Ee Mungu wa malipizi, Ee BWANA, Ee Mungu wa malipizi, uangaze! 2Simama, Ee Mhukumu wa dunia yote, uwape wenye majivuno yale ambayo matendo yao yamestahili. 3Ee BWANA, mpaka lini waovu, mpaka lini waovu wataendelea kusherehekea? 4Maneno ya jeuri yanawatoka kwa wingi; kila mtenda maovu anajisifu. 5Wanawasaga watu wako, Ee BWANA; wanalionea taifa lililo mali yako. 6Wajane na wageni wanawaua; yatima wanawachinja. 7Wanasema, “BWANA hatazami; Mungu wa Yakobo hajali.” 8Pateni ufahamu, enyi watu kama wanyama! Enyi wapumbavu, mtaanza lini kufikiri kwa hekima? 9Je, yeye aliyeliweka sikio mahali pake hasikii? Je, yeye aliyelifinyanga jicho haoni? 10Je, yule anayeadibisha mataifa hatawarudi, yule anayewafundisha wanadamu kila wanachojua? 11BWANA anajua wanadamu wanachofikiri, na kwamba mawazo yao ni mvuke tu. 12Heri mtu yule unayemrudi, Ee BWANA, ukamfunza kwa maelekezo yako, 13ukimpa utulivu katika siku za taabu, huku shimo likichimbwa kwa ajili ya waovu. 14BWANA hatawakataa watu wake; hatawatupa kamwe wale walio mali yake. 15Kwa maana hukumu itaungana tena na yaliyo ya haki, na wote walio wanyofu wa moyo wataifuata. 16Ni nani atakayekuwa upande wangu dhidi ya waovu? Ni nani atakayesimama pamoja nami dhidi ya watenda mabaya? 17Kama BWANA asingenisaidia, ningekuwa nimekwisha kwenda kuishi mahali pa ukimya. 18Mara niliposema, “Mguu wangu unateleza,” upendo wako usiokoma, Ee BWANA, ulinishikilia. 19Wasiwasi unaponisonga, faraja yako hunijaza furaha. 20Je, utawala unaolenga uharibifu utakuwa mshirika wako kamwe, ule unaotumia sheria kuleta mateso? 21Wanakusanyika dhidi ya wenye haki ili kuwaua, na wanawahukumu kifo watu wasio na hatia. 22Lakini BWANA amethibitika kuwa ngome yangu iliyo juu; Mungu wangu amekuwa mwamba unaonihifadhi. 23Atawarudishia uovu wao wenyewe na kuwakomesha kwa ubaya wao wenyewe; BWANA Mungu wetu atawakomesha.