Zaburi 91

1Yeyote anayejifanyia makao chini ya kifuniko cha Aliye Juu Kabisa atalala usiku katika kivuli cha Mwenyezi. 2Hivi ndivyo ninavyosema kuhusu BWANA: “Yeye ni makazi yangu na ngome yangu, Mungu wangu, ninayemtegemea.” 3Ni yeye atakayekuokoa na mtego wa mtegaji ndege na tauni iangamizayo. 4Atatandaza manyoya yake juu yako, na chini ya mabawa yake utapata makazi. Uaminifu wake unakuzunguka kama ngao na ukuta. 5Huna haja ya kuogopa vitisho vinavyokuja usiku wala mshale unaopita kwa kasi mchana, 6wala ugonjwa unaonyemelea gizani, wala maangamizi yanayoharibu saa sita mchana. 7Watu elfu wanaweza kuanguka kando yako, elfu kumi karibu na mkono wako wa kuume, lakini halitakufikia. 8Utatazama tu kwa macho yako mwenyewe na kuwaona waovu wakilipwa. 9Kwa maana wewe, Ee BWANA, ndiwe kimbilio langu! Umemfanya Aliye Juu Kabisa kuwa makao yako. 10Hakuna baya litakalokupiga; hakuna tauni itakayokaribia nyumbani kwako. 11Kwa maana atawapa malaika wake amri juu yako, wakulinde kila uendako. 12Watakubeba mikononi mwao, nawe hutaumiza mguu wako kwenye jiwe. 13Utatembea juu ya simba na nyoka wa sumu; utawaponda wanasimba na majoka chini ya miguu yako. 14“Wale wanaoshikamana nami kwa upendo nitawaokoa; nitawainua juu wasifikiwe, kwa sababu wanalijua jina langu. 15Watanililia, nami nitawajibu; katika dhiki yao nitasimama pamoja nao; nitawaweka huru na kuwapa heshima. 16Nitawashibisha maisha marefu na kuwaonyesha msaada wangu uokoao.”