Zaburi 104

1Nafsi yangu, mbariki BWANA. Ee BWANA Mungu wangu, jinsi ulivyo mkuu! Fahari na enzi ndizo mavazi unayovaa, 2unajifunika nuru kama joho na kulitandaza anga kama kitambaa cha hema, 3anayejenga vyumba vyake vya juu kwa boriti zilizowekwa katika maji yaliyo juu, anayeyageuza mawingu kuwa gari lake na kusafiri juu ya mabawa ya upepo, 4anayezifanya pepo kuwa wajumbe wake na miali ya moto kuwa watumishi wake. 5Aliisimika nchi juu ya nguzo zake, isipinduke kamwe, kwa nyakati zote zijazo. 6Vilindi vilikuwa joho uliloivika; maji yalipanda yakasimama juu ya milima. 7Ulipoyakemea, maji yalikimbia; kwa mshindo wa ngurumo yako yaliondoka upesi, 8yalipanda juu ya milima na kushuka mabondeni, mpaka mahali ulipoyapangia. 9Uliweka mpaka ambao hayawezi kuupita; hayatarudi tena kuifunika nchi. 10Unaziachilia chemchemi katika mikondo ya mabonde; zinapata njia kati ya milima. 11Kila kiumbe cha nyika kinakunywa humo; huko punda mwitu wanazima kiu yao. 12Karibu nazo ndege wa angani wanatua na kulia kutoka katika matawi yenye majani mengi. 13Kutoka katika vyumba vyake vya juu anainywesha milima, na nchi inashiba matunda ya kazi yako. 14Anaotesha majani kwa ajili ya makundi ya wanyama na mimea ili watu waitunze, chakula kitoke ardhini, 15divai inayoleta furaha mioyoni mwa watu, mafuta yanayozing’arisha nyuso, na mkate unaowapa watu nguvu. 16Miti ya BWANA ina maji yote inayohitaji, mierezi aliyoipanda juu ya Lebanoni, 17ambamo ndege hujenga viota vyao, naye korongo anaishi juu katika misonobari. 18Mbuzi mwitu wanayo milima mirefu, na pimbi wanajificha katika majabali. 19Aliufanya mwezi kuonyesha sikukuu na majira; jua linajua saa ya kuzama. 20Unatuma giza, usiku unaingia, na kila mnyama wa msituni anatoka kwa kunyemelea. 21Wanasimba wananguruma wanapowinda, wakimwomba Mungu chakula chao. 22Jua linapochomoza wanarudi pamoja na kulala kupumzika mapangoni mwao. 23Ndipo wanadamu wanatoka kwenda kazini na kuendelea na shughuli zao mpaka jioni. 24Ee BWANA, kazi zako ni nyingi na za kila aina! Umezifanya zote kwa ustadi na hekima; nchi imejaa vitu ulivyoviumba. 25Itazame bahari, kubwa mno na iliyoenea kila upande! Imejaa viumbe visivyohesabika, viumbe hai vidogo kabisa na vikubwa mno. 26Meli zinasafiri juu yake, naye Lewiathani pia, kiumbe uliyemfinyanga acheze katika mawimbi yake. 27Kila mmoja wao anakusubiri uwape chakula wanapokihitaji. 28Unawagawia, nao wanakiokota; unaufungua mkono wako, nao wanashiba vitu vizuri. 29Ukiugeuza uso wako mbali, wanaingiwa na hofu; ukiiondoa pumzi yao, wanakata roho na kurudi kwenye mavumbi walimotoka. 30Unapoituma roho yako, wanaanza kuwako, nawe unaufanya upya uso wa nchi. 31Utukufu wa BWANA na udumu milele; BWANA na afurahie vitu alivyovifanya, 32anayeitupia nchi jicho nayo inatikisika, anayeigusa milima nayo inafuka moshi. 33Maisha yangu yote nitamwimbia BWANA; maadamu bado nipo nitampigia Mungu wangu muziki. 34Ninayoyatafakari na yampendeze; kwa upande wangu, furaha yangu iko katika BWANA. 35Wenye dhambi na wafutiliwe mbali duniani, na asibaki mtu mwovu hata mmoja. Nafsi yangu, mbariki BWANA. Msifuni BWANA!