Zaburi 81

¹Mwimbieni kwa furaha, Mungu aliye nguvu yetu; mpigieni kelele za shangwe Mungu wa Yakobo!

²Anzeni wimbo, pigeni matari, pigeni kinubi na zeze kwa sauti nzuri.

³Pigeni baragumu za pembe za kondoo dume wakati wa Mwandamo wa Mwezi, na wakati wa mwezi mpevu, katika siku ya Sikukuu yetu;

⁴hii ni amri kwa Israeli, agizo la Mungu wa Yakobo.

⁵Aliiweka iwe kama sheria kwa Yosefu alipotoka dhidi ya Misri, huko tulikosikia lugha ambayo hatukuielewa.

⁶Asema, “Nimeondoa mzigo mabegani mwao; mikono yao iliwekwa huru kutoka kwenye kikapu.

⁷Katika shida yako uliniita nami nikakuokoa, nilikujibu katika mawingu yenye ngurumo; nilikujaribu katika maji ya Meriba.

⁸“Enyi watu wangu, sikieni, nami nitawaonya: laiti kama mngenisikiliza, ee Israeli!

⁹Hamtakuwa na mungu mgeni miongoni mwenu; msimsujudie mungu wa kigeni.

¹⁰Mimi ni Bwana Mungu wako, niliyekutoa nchi ya Misri. Panua sana kinywa chako nami nitakijaza.

¹¹“Lakini watu wangu hawakutaka kunisikiliza; Israeli hakutaka kunitii.

¹²Basi niliwaacha katika ukaidi wa mioyo yao wafuate mashauri yao wenyewe.

¹³“Laiti kama watu wangu wangalinisikiliza, kama Israeli wangalifuata njia zangu,

¹⁴ningaliwatiisha adui zao kwa haraka, na kuugeuza mkono wangu dhidi ya watesi wao!

¹⁵Wale wanaomchukia Bwana wangalinyenyekea mbele zake, na adhabu yao ingedumu milele.

¹⁶Bali ninyi mngalilishwa ngano iliyo bora, na kuwatosheleza kwa asali itokayo kwenye mwamba.”