Zaburi 81

1Mwimbieni Mungu kwa furaha, aliye nguvu yetu; mpigieni Mungu wa Yakobo kelele za shangwe! 2Anzisheni muziki na kupiga matari; pigeni kinubi kitamu pamoja na zeze. 3Wakati wa mwezi mpya, pigeni baragumu, na wakati wa mwezi mpevu, kwa siku ya sikukuu yetu, 4kwa maana hii ni kanuni iliyowekwa kwa Israeli, agizo lililotolewa na Mungu wa Yakobo. 5Aliifanya kuwa agizo zito kwa Yusufu alipotoka kupigana na nchi ya Misri. Ndipo nikasikia sauti nisiyoijua kamwe: 6“Niliuondoa mzigo mzito mabegani mwao; mikono yao iliachilia kikapu cha matofali. 7Ulipokuwa katika taabu ulilia, nami nikakuweka huru; nilikujibu kutoka mahali pa siri pa radi; nilikujaribu penye maji ya Meriba. Sela 8Sikilizeni, Ee watu wangu, nami nitawapa onyo zito; Ee Israeli, laiti ungenisikiliza! 9Usiwe na mungu mgeni kati yako; usimsujudie mungu yeyote wa kigeni. 10Mimi ni BWANA Mungu wako, niliyekupandisha kutoka katika nchi ya Misri. Fungua kinywa chako kwa upana kadiri uwezavyo, nami nitakijaza. 11Lakini watu wangu walikataa kuisikiliza sauti yangu; Israeli hakutaka kuwa na lolote nami. 12Kwa hiyo niliwaacha na mioyo yao mikaidi, nao wakafuata mipango yao wenyewe. 13Laiti watu wangu wangenisikiliza, laiti Israeli angetembea katika njia zangu, 14ningewashusha adui zao upesi na kugeuza mkono wangu dhidi ya washambuliaji wao. 15Wanaomchukia BWANA wangekuja wakitambaa kwake, na adhabu yao isingekwisha kamwe. 16Angewapa ngano iliyo bora kabisa kula, nami ningekushibisha kwa asali kutoka mwambani.”