Zaburi 140

1Ee BWANA, uniokoe na watu waovu; unilinde salama na wale wanaotenda jeuri, 2wanaopanga madhara mioyoni mwao na kuanzisha mapigano siku baada ya siku. 3Wanazinoa ndimi zao kama nyoka; sumu ya kifutu imejificha nyuma ya midomo yao. Sela 4Ee BWANA, unilinde na makucha ya waovu; unikinge na watu wa jeuri wanaopanga njama ya kuniangusha. 5Watu wenye majivuno wamenifichia mtego; wametandaza kamba kama wavu kando ya njia na kunitegea mitego ya kunikamata. Sela 6Nimemwambia BWANA, “Wewe ni Mungu wangu.” Utege sikio lako, Ee BWANA, usikie sauti ya kusihi kwangu. 7Bwana MUNGU, mwenye nguvu unayeniokoa, umekifunika kichwa changu siku silaha zinapogongana. 8Ee BWANA, usiwape waovu wanachokitamani; usiache hila yao ifanikiwe, la sivyo watajivuna. Sela 9Kwa wale wanaonizingira, madhara yanayosemwa na midomo yao wenyewe na yawarudie juu ya vichwa vyao. 10Makaa ya moto na yanyeshe juu yao; na watupwe motoni, katika mashimo marefu, wasiinuke tena kamwe. 11Msingiziaji yeyote asipate mahali imara katika nchi; maafa na yawawinde watu wa jeuri na kuwapiga tena na tena. 12Ninajua kwamba BWANA ataishughulikia kesi ya wanaoonewa na kuhakikisha kwamba wahitaji wanapata haki. 13Wenye haki hakika watalishukuru jina lako, na watu waadilifu watafanya makao yao mbele yako.