Zaburi 86

1Maombi ya Daudi. Ee BWANA, unitegee sikio lako unijibu, kwa sababu mimi ni mnyonge na mhitaji. 2Uyalinde maisha yangu, kwa maana mimi ni mwaminifu kwako. Wewe ni Mungu wangu; uniokoe mimi mtumishi wako, kwa maana ninakutumaini. 3Bwana, unionyeshe neema yako; ninakulilia mchana kutwa. 4Umfurahishe mtumishi wako, kwa maana moyo wangu unakuelekea wewe, Ee Bwana. 5Kwa maana wewe, Bwana, u mwema na mwepesi wa kusamehe, umejaa upendo usiokoma kwa kila mtu anayekuita. 6Ee BWANA, utegee sikio lako maombi yangu; usikilize sauti yangu ninapokuomba rehema. 7Siku ya taabu yangu ninakulilia, nikiwa na hakika kwamba utanijibu. 8Bwana, hakuna mungu aliye kama wewe, wala hakuna aliyefanya kazi kama zako. 9Kila taifa uliloliumba litakuja kusujudu mbele yako, Bwana, na kulipa utukufu jina lako. 10Kwa maana wewe ni mkuu, mtenda maajabu; wewe peke yako ndiwe Mungu. 11Ee BWANA, unifundishe njia yako, nami nitaishi kwa kufuata kweli yako; unipe moyo usiogawanyika, ulicheshimu jina lako. 12Bwana Mungu wangu, nitakushukuru kwa moyo wangu wote na kulitukuza jina lako siku zote. 13Kwa maana upendo wako usiokoma kwangu ni mkuu; umenitoa katika vilindi vya Kuzimu. 14Ee Mungu, wenye kiburi wamenishambulia, na genge la watu wakatili linayawinda maisha yangu; wewe hawakuwazii hata kidogo. 15Lakini wewe, Bwana, u Mungu uliyejaa huruma na neema, si mwepesi wa hasira, umejaa upendo usiokoma na uaminifu. 16Unigeukie unionyeshe neema yako; umpe mtumishi wako nguvu zako, umwokoe mwana wa mtumishi wako wa kike. 17Unipe ishara kwamba unanitakia mema, ili wanaonichukia waione na kuaibika, kwa sababu wewe, Ee BWANA, umenisaidia na kunifariji.