Zaburi 26

¹Ee Bwana, nithibitishe katika haki, maana nimeishi maisha yasiyo na lawama; nimemtumainia Bwana bila kusitasita.

²Ee Bwana, unijaribu, unipime, uuchunguze moyo wangu na mawazo yangu;

³kwa maana upendo wako uko mbele yangu daima, nami natembea siku zote katika kweli yako.

⁴Siketi pamoja na watu wadanganyifu, wala siandamani na wanafiki,

⁵ninachukia kusanyiko la watenda mabaya na ninakataa kuketi pamoja na waovu.

⁶Ninanawa mikono yangu kwa kuwa sina hatia, naikaribia madhabahu yako, Ee Bwana,

⁷nikitangaza sifa yako kwa sauti kubwa, huku nikisimulia matendo yako ya ajabu.

⁸Ee Bwana, naipenda nyumba yako mahali unakoishi, mahali ambapo utukufu wako hukaa.

⁹Usiiondoe nafsi yangu pamoja na watenda dhambi, wala uhai wangu pamoja na wamwagao damu,

¹⁰ambao mikononi mwao kuna mipango miovu, ambao mikono yao ya kuume imejaa rushwa.

¹¹Bali mimi ninaishi maisha yasiyo na lawama; nikomboe na unihurumie.

¹²Miguu yangu imesimama katika uwanja tambarare; katika kusanyiko kuu nitamsifu Bwana.