Zaburi 108

1Moyo wangu u imara, Ee Mungu; nitaimba na kupiga nyimbo za sifa kwa nafsi yangu yote. 2Amkeni sasa, kinubi na zeze! Nitaiamsha alfajiri. 3Ee BWANA, nitakushukuru mbele ya watu wote; nitaimba sifa zako katika kila taifa. 4Kwa maana upendo wako usiokoma umeinuka juu kuliko mbingu, na uaminifu wako unafika mawinguni. 5Ee Mungu, uinuliwe juu kuliko mbingu; utukufu wako uenee juu ya dunia yote. 6Ili wale unaowapenda wawekwe huru, lete wokovu kwa mkono wako wa kuume, unijibu! 7Mungu amesema kutoka mahali pake patakatifu: “Nitafurahi nikiigawa Shekemu na kulipima Bonde la Sukothi. 8Gileadi ni mali yangu, Manase ni wangu; Efraimu ni kofia ya chuma kichwani mwangu, Yuda ni fimbo ya utawala wangu. 9Moabu ni bakuli langu la kuoshea; juu ya Edomu natupa kiatu changu; napiga kelele ya mshindi juu ya Ufilisti!” 10Ni nani atakayenipeleka ndani ya mji wenye kuta? Ni nani atakayeniongoza mpaka Edomu? 11Je, si wewe, Ee Mungu, uliyetukataa, na hutoki tena pamoja na majeshi yetu? 12Utusaidie dhidi ya adui, kwa maana msaada wowote ambao watu wanaweza kuleta hauna faida. 13Mungu akiwa upande wetu tutapigana kwa ujasiri; yeye ndiye atakayewaponda adui zetu chini ya miguu.