Zaburi 144

1Ya Daudi. Abarikiwe BWANA, mwamba wangu, anayeifundisha mikono yangu kupigana na vidole vyangu kufanya vita. 2Yeye ni upendo wangu usiokoma na ngome yangu, mnara wangu juu milimani na yule anayeniweka huru, ngao yangu, ninayemkimbilia, anayewaweka watu wangu chini ya utawala wangu. 3Ee BWANA, wanadamu ni nini, hata uwatambue, watu wa kufa tu, hata uwafikirie? 4Wanadamu ni kama pumzi; siku zao ni kivuli kinachopita. 5Ee BWANA, uziinamishe chini mbingu zako ushuke; uiguse milima uifanye itoe moshi. 6Ufanye umeme umulike uwatawanye adui; mishale yako iruke uwavuruge. 7Unyooshe mikono yako kutoka juu; uniweke huru na unitoe katika maji makuu, katika makucha ya wageni, 8ambao vinywa vyao havisemi ila uongo, na mkono wao wa kulia huinuliwa kuapa uongo. 9Ee Mungu, nitakuimbia wimbo mpya; nitakupigia muziki kwa kinubi cha nyuzi kumi, 10yule anayewapa wafalme ushindi, anayemnyakua mtumishi wake Daudi kutoka upanga wa ukatili. 11Uniweke huru na unitoe katika makucha ya wageni, ambao vinywa vyao havisemi ila uongo, na mkono wao wa kulia huinuliwa kuapa uongo. 12Ndipo wana wetu na wawe kama miche iliyorefuka wangali wachanga, na binti zetu kama nguzo za pembeni zilizochongwa kwa ajili ya nyumba ya kifalme, 13ghala zetu zijae, zikitoa kila aina ya chakula, makundi yetu ya kondoo yaongezeke kufikia maelfu, makumi ya maelfu katika malisho yetu, 14ng’ombe wetu wawe na mimba. Pasiwe na ufa katika kuta zetu, wala kwenda uhamishoni, wala kilio cha dhiki katika mitaa yetu. 15Heri watu wanaoishi hivi! Heri watu walio na BWANA kuwa Mungu wao!