Zaburi 59

1Uniokoe na adui zangu, Ee Mungu wangu; uniinue juu mbali na wale wanaoinuka dhidi yangu. 2Uniokoe na wale wanaotenda uovu; uniokoe na watu wanaomwaga damu. 3Tazama, wanayavizia maisha yangu; watu wenye nguvu wanaungana dhidi yangu, ingawa sijaasi wala sijatenda dhambi, Ee BWANA. 4Bila kosa langu wanaharakisha kushika nafasi zao. Amka, uje kunilaki, na utazame! 5Ee BWANA Mungu wa majeshi, Mungu wa Israeli, inuka uyaite mataifa yote yatoe hesabu; usiwahurumie wale wanaopanga uovu kwa usaliti wao. Sela 6Jioni ikifika wanarudi, wakinguruma kama mbwa wanapozurura mjini. 7Tazama jinsi vinywa vyao vinavyobubujika matusi; midomo yao ni panga, kwa maana wanasema, “Nani atasikia?” 8Lakini wewe, Ee BWANA, unawacheka; wewe unayafanyia mataifa yote mzaha. 9Mbele ya nguvu zake nitakesha nikikungojea wewe, kwa maana Mungu ni ngome yangu ya juu. 10Mungu wangu wa upendo usiokoma atatangulia mbele yangu; Mungu ataniwezesha kuwatazama adui zangu kwa ushindi. 11Usiwaue kabisa mara moja, watu wangu wasije wakasahau; kwa uweza wako uwafanye wayumbayumbe na uwashushe, Ee Bwana, ngao yetu. 12Kila neno la midomo yao ni dhambi vinywani mwao; na wanaswe na kiburi chao wenyewe, kwa ajili ya laana na uongo wanaousema. 13Uwaangamize kwa hasira yako, uwaangamize mpaka watoweke, ili watu wajue kwamba Mungu anatawala juu ya Yakobo hadi miisho ya dunia. Sela 14Jioni ikifika wanarudi, wakinguruma kama mbwa wanapozurura mjini. 15Wanazunguka wakitafuta chakula, na wasiposhiba, wanakaa nje usiku kucha. 16Lakini mimi nitaimba juu ya uweza wako, na alfajiri nitashangilia kwa ajili ya upendo wako usiokoma, kwa maana wewe umekuwa ngome yangu ya juu, mahali pa kukimbilia nilipokuwa katika taabu. 17Ee Nguvu yangu, nitakuimbia wewe, kwa maana Mungu ni ngome yangu ya juu, Mungu wangu wa upendo usiokoma.