Zaburi 107

1Mshukuruni BWANA, kwa maana ni mwema; upendo wake usiokoma unadumu milele. 2Na waseme hivyo wale ambao BWANA amewakomboa, wale aliowaweka huru kutoka mikononi mwa adui, 3na kuwaleta kutoka nchi nyingine, kutoka mashariki na magharibi, kaskazini na kusini. 4Wengine walipotea nyikani, katika njia ya ukame, wasipate mji wa kuishi. 5Wakiwa na njaa kali na kiu, waliona uhai wao ukiwaishia. 6Katika dhiki yao walimlilia BWANA, naye akawanasua katika taabu zao. 7Aliwaongoza katika njia tambarare mpaka wakafika kwenye mji wa kuishi. 8Na wamshukuru BWANA kwa upendo wake usiokoma na kwa maajabu anayowatendea wanadamu. 9Kwa maana huwapa maji wenye kiu na kuwashibisha wenye njaa kwa chakula kizuri. 10Wengine waliishi gizani, katika giza nene kabisa, wakiwa wamefungwa katika dhiki na minyororo ya chuma, 11kwa sababu walikuwa wamepinga yale aliyosema Mungu na kudharau kusudi la Aliye Juu Kabisa. 12Basi akakivunja kiburi chao kwa kazi ngumu; walianguka, wala hakuna aliyekuja kuwasaidia. 13Katika dhiki yao walimlilia BWANA, naye akawaokoa katika taabu zao. 14Aliwatoa katika giza na giza nene kabisa, akaikatakata minyororo iliyowafunga. 15Na wamshukuru BWANA kwa upendo wake usiokoma na kwa maajabu anayowatendea wanadamu. 16Kwa maana huivunjavunja milango ya shaba na kuyakatakata makomeo ya chuma. 17Wengine walikuwa wapumbavu, na njia zao za uasi na maovu yao yakawaletea mateso. 18Hawakuweza hata kukitazama chakula, wakakaribia malango ya mauti. 19Katika dhiki yao walimlilia BWANA, naye akawaokoa katika taabu zao. 20Alituma neno lake akawaponya; akawavuta kutoka katika shimo la mauti. 21Na wamshukuru BWANA kwa upendo wake usiokoma na kwa maajabu anayowatendea wanadamu. 22Na walete sadaka za shukrani, na kwa kelele za furaha wasimulie aliyoyatenda. 23Wengine walisafiri baharini kwa merikebu, wakifanya biashara katika maji makuu, 24waliona wenyewe matendo ya BWANA, maajabu yake huko kilindini. 25Kwa neno lake dhoruba kali ilizuka, ikayainua juu mawimbi ya bahari. 26Walirushwa juu mpaka angani, na chini mpaka vilindini; katika hatari hiyo mioyo yao ilikata tamaa. 27Waliyumbayumba na kupepesuka kama mtu aliyelewa, na ujuzi wao wote wa bahari ukawa bure. 28Katika dhiki yao walimlilia BWANA, naye akawatoa katika taabu zao. 29Aliigeuza dhoruba kuwa upepo mwanana, na mawimbi yaliyowazunguka yakanyamaza. 30Jinsi walivyofurahi kila kitu kilipotulia! Naye akawafikisha kwenye bandari waliyoitamani. 31Na wamshukuru BWANA kwa upendo wake usiokoma na kwa maajabu anayowatendea wanadamu. 32Na wamwinue juu mahali watu wanapokusanyika, na wamsifu mahali wazee wanapoketi barazani. 33Anaweza kuikausha mito hata ikawa jangwa, na kugeuza chemchemi za maji kuwa nchi kame, 34na shamba lenye rutuba kuwa uwanda wa chumvi, kwa sababu ya uovu wa wale wanaoishi huko. 35Hulifanya jangwa kuwa bwawa la maji, na nchi kavu kuwa chemchemi zinazobubujika. 36Huko huwaweka wenye njaa, nao hujenga mji wa kuishi. 37Hupanda mbegu mashambani na kupanda mizabibu, wakavuna mavuno mengi. 38Huwabariki, na idadi yao huongezeka zaidi na zaidi; haachi mifugo yao ipungue. 39Kisha hupungua na kushushwa chini kwa utawala wa kikatili, maafa na majonzi. 40Huwamwagia dharau wenye nguvu na kuwaacha wamepotea nyikani pasipo njia. 41Lakini huwainua wahitaji kutoka katika dhiki yao, na kuzifanya jamaa zao ziongezeke kama makundi ya kondoo. 42Wale wanaoishi kwa unyofu hutazama kwa furaha, na uovu wote hukosa la kusema. 43Mwenye hekima na ayazingatie mambo haya na kuutafakari upendo usiokoma ambao BWANA ameuonyesha tena na tena.