Zaburi 106

1Msifuni BWANA! Mshukuruni BWANA, kwa maana ni mwema; upendo wake usiokoma unadumu milele. 2Ni nani anayeweza kuyaeleza kwa maneno matendo makuu ya BWANA, au kutangaza sifa zote anazostahili? 3Heri wale wanaoshikilia hukumu ya haki na kutenda yaliyo haki kila wakati! 4Ee BWANA, unikumbuke unapowaonyesha watu wako kibali; unijie na msaada wako wa kuokoa, 5ili niyaone mema unayowapa wateule wako, nifurahi pamoja na taifa lako katika furaha yake, na kukutukuza pamoja na watu walio mali yako. 6Kama babu zetu, tumetenda dhambi; tumepotoka na kufanya maovu. 7Babu zetu walipokuwa Misri hawakuyatia moyoni maajabu yako; hawakukumbuka jinsi upendo wako usiokoma ulivyo mkuu, na huko baharini, Bahari ya Shamu, wakaasi. 8Hata hivyo aliwaokoa, kwa heshima ya jina lake, ili aonyeshe jinsi alivyo mwenye uweza. 9Aliikaripia Bahari ya Shamu, ikakauka; akawavusha katika vilindi kana kwamba ni nchi tambarare. 10Aliwaokoa kutoka katika mamlaka ya yule aliyewachukia, akawaweka huru kutoka mikononi mwa adui. 11Maji yaliwafunika adui zao; hakubaki hata mmoja. 12Ndipo wakaziamini ahadi zake, wakamwimbia nyimbo za sifa. 13Upesi ulioje walisahau matendo yake! Hawakutaka kungoja kusikia alilokusudia. 14Huko jangwani tamaa zao zilizidi mipaka, na nyikani wakamjaribu Mungu. 15Aliwapa walichodai, lakini pamoja nacho akawaletea ugonjwa uliowadhoofisha. 16Wakamwonea wivu Musa pale kambini, na Haruni, mtu aliyetengwa kuwa mtakatifu kwa BWANA. 17Ardhi ilipasuka ikammeza Dathani; ikamfunika Abiramu na wafuasi wake. 18Kisha moto ukalipuka katika kundi lao, na miali ikawala waovu. 19Walitengeneza ndama huko Horebu, wakainama mbele ya sanamu ya chuma kilichoyeyushwa. 20Walimbadilisha Mungu, aliye utukufu wao, kwa sura ya fahali anayekula majani. 21Walimsahau Mungu Mwokozi wao na matendo makuu aliyoyafanya katika Misri, 22maajabu katika nchi ya Hamu, matendo ya kutisha kwenye Bahari ya Shamu. 23Hivyo akasema kwamba angewafutilia mbali; lakini Musa, mteule wake, alisimama mahali palipobomoka mbele yake ili kuigeuza hasira yake asiwaangamize. 24Waliidharau nchi ya furaha, wala hawakuamini yale aliyokuwa ameahidi, 25Walinung’unika ndani ya hema zao, wala hawakuitii sauti ya BWANA. 26Basi akainua mkono wake na kuapa kwamba wangekufa jangwani, 27na kwamba watoto wao wangeangushwa kati ya mataifa na kutawanywa katika nchi za kigeni. 28Walijifunga kwa Baali wa Peori, wakala sadaka zilizotolewa kwa wafu. 29Walimkasirisha kwa yale waliyoyatenda, na tauni ikalipuka kati yao. 30Kisha Finehasi akainuka akaingilia kati, nayo tauni ikakomeshwa. 31Na tendo hilo likahesabiwa kwake kuwa haki kwa vizazi vyote, hata milele. 32Kwenye maji ya Meriba walimkasirisha, naye Musa akapata hasara kubwa kwa sababu yao, 33kwa kuwa walimpinga Roho wake, na Musa akatamka maneno ya haraka kwa midomo yake. 34Hawakuyafutilia mbali mataifa ambayo BWANA alikuwa amewaagiza wayaangamize, 35badala yake walichanganyika na mataifa, wakazifuata desturi zao. 36Walizitumikia sanamu za mataifa hayo, nazo zikawa mtego kwao. 37Waliwatoa hata wana wao na binti zao wenyewe kuwa sadaka kwa mashetani. 38Walimwaga damu ya wasio na hatia, wana wao na binti zao wenyewe, waliochinjwa kuwa sadaka kwa sanamu za Kanaani, na nchi ikanajisiwa kwa umwagaji wa damu. 39Walijinajisi kwa yale waliyoyatenda, wakakosa uaminifu kama kahaba katika njia zao. 40Basi BWANA akawaka hasira juu ya watu wake, akaanza kuchukizwa na watu walio mali yake. 41Aliwatia katika mikono ya mataifa mengine, na watu waliowachukia wakawa mabwana wao. 42Adui zao waliwaponda na kuwalazimisha kuinama chini ya mamlaka yao. 43Tena na tena aliwaokoa, lakini wao wakashikilia mipango yao ya uasi, wakazama katika dhambi yao. 44Hata hivyo, aliiona taabu waliyokuwa nayo kilio chao kilipomfikia. 45Kwa ajili yao alilikumbuka agano lake, akaiacha hasira yake, kwa sababu upendo wake usiokoma ni mkuu mno. 46Aliwafanya wote waliokuwa wamewachukua mateka wawahurumie. 47Utuokoe, Ee BWANA Mungu wetu, utukusanye tena kutoka katikati ya mataifa, ili tulishukuru jina lako takatifu na kuona fahari katika kukusifu. 48BWANA, Mungu wa Israeli, abarikiwe tangu zamani za kale hata zama zijazo! Watu wote na waitikie, “Amina!” Msifuni BWANA!