Zaburi 2

1Kwa nini mataifa yanafanya ghasia, na watu wananong’ona mipango isiyo na maana? 2Wafalme wa dunia wanashika nafasi zao, na watawala wanapanga njama pamoja dhidi ya BWANA na dhidi ya mfalme wake aliyempaka mafuta. 3“Tuivunje minyororo yao,” wanasema, “na kuzitupilia mbali kamba zao.” 4Yeye aliyeketi kwenye kiti cha enzi mbinguni anacheka; Bwana anawadharau. 5Ndipo anasema nao kwa hasira na kuwajaza hofu kwa ghadhabu yake inayowaka. 6“Mimi ndiye niliyemweka mfalme wangu mahali pake juu ya Sayuni, mlima wangu mtakatifu.” 7Nitatangaza amri. BWANA aliniambia, “Wewe ni mwanangu. Leo hii nimekuwa baba yako. 8Niombe, nitakupa mataifa uyarithi, na sehemu za mbali kabisa za dunia ziwe mali yako. 9Utawaponda kwa fimbo ya enzi ya chuma na kuwavunja vipande vipande kama chungu cha udongo.” 10Kwa hiyo, enyi wafalme, onyesheni akili! Kubalini kuonywa, ninyi mnaotawala dunia. 11Mtumikieni BWANA kwa unyenyekevu na heshima, na furaha yenu ichanganyike na kutetemeka. 12Mbusuni mwana, la sivyo atakasirika, nanyi mtaangamia njiani mwenu, kwa maana hasira yake inaweza kuwaka ghafla. Wana heri kweli wote wanaomfanya yeye kuwa kimbilio lao!