Zaburi 24

1Ya Daudi. Zaburi. Dunia ni mali ya BWANA, pamoja na kila kitu kinachoijaza, ulimwengu na kila mtu anayeishi humo. 2Kwa maana ni yeye aliyeweka misingi yake juu ya bahari na kuiimarisha juu ya mito. 3Ni nani mwenye haki ya kuupanda mlima wa BWANA? Ni nani anayeweza kusimama mahali pa utakatifu wake? 4Wale ambao mikono yao haina hatia na mioyo yao ni safi, wasioutaja uhai wa Mungu mwenyewe kuthibitisha uongo, wala hawakuapa kiapo ili kudanganya. 5Watu kama hao wanapata baraka kutoka kwa BWANA, na haki kutoka kwa Mungu anayewaokoa. 6Ndivyo walivyo watu wanaomtafuta, wanaoutafuta uso wako: huyu ndiye Yakobo. Sela 7Enyi malango, inueni vichwa vyenu juu! Jiinueni, enyi milango ya tangu zamani, ili Mfalme wa utukufu aingie. 8Ni nani huyu Mfalme wa utukufu? Ni BWANA, mwenye uweza na nguvu, BWANA, shujaa mwenye nguvu vitani. 9Enyi malango, inueni vichwa vyenu juu! Viinueni, enyi milango ya tangu zamani, ili Mfalme wa utukufu aingie. 10Basi yeye ni nani, huyu Mfalme wa utukufu? Ni BWANA wa Majeshi; yeye ndiye Mfalme mtukufu. Sela