Zaburi 60

1Ee Mungu, wewe umetutupa na kubomoa kuta zetu. Umekasirika; utugeukie tena! 2Uliifanya nchi itetemeke na kuirarua; ziba nyufa zake, kwa maana inaporomoka. 3Umewaacha watu wako waone mambo magumu; wewe umetunywesha divai iliyotufanya tuyumbe. 4Kwa ajili ya wanaokucha wewe, wewe umeinua bendera ya kukusanyikia, mbali na mishale ya upinde. Sela 5Ili wale wewe unaowapenda wawekwe huru, lete wokovu kwa mkono wako wa kuume na unijibu! 6Mungu amesema kutoka mahali pake patakatifu: “Nitafurahi ninapoigawa Shekemu na kulipima Bonde la Sukothi. 7Gileadi ni mali yangu, Manase ni wangu; Efraimu ni kofia ya chuma kichwani pangu, Yuda ni fimbo ya utawala wangu. 8Moabu ni bakuli langu la kunawia; juu ya Edomu ninatupa kiatu changu; Ee Ufilisti, nipigie mimi kelele za shangwe!” 9Nani atanipeleka ndani ya mji wenye kuta? Nani ataniongoza njia yote mpaka Edomu? 10Je, si wewe, Ee Mungu, uliyetukataa na kuacha kutoka pamoja na majeshi yetu? 11Utusaidie dhidi ya adui, kwa maana msaada wowote wa wanadamu hauna maana. 12Mungu akiwa upande wetu tutapigana kwa ujasiri; yeye ndiye atakayewaponda adui zetu chini ya miguu.