Zaburi 66

1Kwa kiongozi wa kwaya. Wimbo. Zaburi. Mpazieni Mungu sauti ya shangwe, dunia yote! 2Pigeni muziki kwa heshima ya jina lake; mpeni yeye sifa zilizojaa utukufu! 3Mwambieni Mungu, “Matendo yako yanatisha kweli! Kwa sababu nguvu zako ni kuu mno, adui zako wanajikunyata na kujipendekeza mbele yako. 4Dunia yote inakuinamia wewe na kukuimbia wewe; wanalipigia jina lako muziki.” Sela 5Njooni mkatazame kazi za Mungu, jinsi matendo yake kwa wanadamu yalivyo ya kutisha! 6Aliibadilisha bahari kuwa ardhi kavu; walivuka mto kwa miguu. Huko na tufurahi ndani yake! 7Anatawala kwa uweza wake milele, na macho yake yanayaangalia mataifa kwa makini. Waasi wasijiinue. Sela 8Enyi mataifa ya dunia, mbarikini Mungu wetu, na mfanye sauti ya sifa zake ivume, 9yeye anayetuweka hai wala hajaacha miguu yetu ijikwae. 10Kwa maana wewe umetupima, Ee Mungu; wewe umetusafisha jinsi fedha inavyosafishwa. 11Ulituongoza mpaka mtegoni; wewe uliweka mzigo mzito migongoni mwetu. 12Uliwaacha wanadamu tu watukanyage vichwani; tulipita katika moto na maji, lakini wewe ulitutoa na kutuleta kwenye neema tele. 13Nitaingia nyumbani mwako na sadaka nzima za kuteketezwa na kukutimizia wewe nadhiri zangu, 14ahadi zilizobubujika kutoka midomoni mwangu, ambazo kinywa changu kilizitoa wakati wa dhiki yangu. 15Nitakutolea wewe sadaka za kuteketezwa za wanyama walionona, pamoja na moshi wa kondoo dume ukipanda kwako; nitatoa mafahali pamoja na mbuzi. Sela 16Njooni, sikilizeni, ninyi nyote mnaomcha Mungu; niwasimulie mambo yeye aliyonitendea. 17Kwa kinywa changu mwenyewe nilimlilia, na sifa za kumtukuza zilikuwa tayari chini ya ulimi wangu. 18Bwana asingenisikia kama ningeuhifadhi uovu moyoni mwangu. 19Lakini kweli Mungu amenisikia; yeye amesikiliza kwa makini nilipoomba. 20Mungu na abarikiwe, ambaye hakuisukuma kando sala yangu wala kuniondolea upendo wake usiokoma!