Zaburi 74

1Maskili ya Asafu. Ee Mungu, kwa nini umetutupa kabisa? Kwa nini hasira yako inawaka na kutoa moshi juu ya kundi unalolichunga wewe? 2Uwakumbuke watu wako, uliowafanya kuwa wako tangu zamani, kabila ulilolikomboa kuwa urithi wako; uukumbuke mlima Sayuni, ulipofanya makao yako. 3Njoo, uelekeze hatua zako juu ya magofu haya yasiyo na mwisho; adui amevunjavunja kila kitu katika mahali patakatifu. 4Adui zako walinguruma katikati ya mahali ulipokutana nasi; waliweka bendera zao wenyewe kuwa ishara. 5Walionekana kama wakata miti wanaoinua mashoka yao dhidi ya kichaka kizito cha miti. 6Na sasa wanakatakata mbao zake zote zilizochongwa kwa mashoka na nyundo. 7Waliliteketeza kwa moto patakatifu pako; waliiangusha chini makao ya jina lako na kuyanajisi. 8Walisema mioyoni mwao, “Na tuwapige chini, wote!” Waliteketeza mahali pote pa kukutania kwa Mungu katika nchi nzima. 9Hatuoni tena ishara kwa ajili yetu; hakuna nabii aliyebaki, wala hakuna kati yetu awezaye kusema itakuwa hivi mpaka lini. 10Mpaka lini, Ee Mungu, adui atadhihaki? Je, mtesi ataendelea kulitukana jina lako milele? 11Kwa nini unauzuia mkono wako, mkono wako wa kuume wenye nguvu? Utoe katika joho lako uwakomeshe! 12Lakini Mungu amekuwa Mfalme wangu tangu kale, akileta uokoaji katikati ya dunia. 13Kwa uweza wako wewe uliipasua bahari vipande viwili; wewe uliviponda vichwa vya majoka majini. 14Wewe ulivivunja vichwa vya Lewiathani na kumfanya chakula cha viumbe wa jangwani. 15Wewe ulifungua chemchemi na vijito; wewe uliifanya mito iliyotiririka daima ikauke. 16Mchana ni wako, na usiku ni wako pia; wewe uliweka mwezi na jua mahali pake. 17Wewe uliweka kila mpaka wa dunia; kiangazi na masika ni kazi ya mikono yako. 18Kumbuka hili, BWANA: adui amekudhihaki wewe, na watu wapumbavu wamelitukana jina lako. 19Usimwache hua wako kuwa mawindo ya wanyama wenye uchu; usiwasahau kabisa watu wako wanaoteseka. 20Ulikumbuke agano, kwa sababu kila pembe yenye giza ya nchi imejaa maficho ya jeuri. 21Usiwaache waliokandamizwa warudi na aibu; maskini na mhitaji na walisifu jina lako. 22Simama, Ee Mungu! Utetee hoja yako mwenyewe; kumbuka matukano ambayo mpumbavu anakutupia mchana kutwa. 23Usipuuze kelele za adui zako, ghasia za wale wanaoinuka dhidi yako, zisizokoma kupanda juu.