Zaburi 139

1Kwa kiongozi wa kwaya. Ya Daudi. Zaburi. Ee BWANA, umenitazama ndani kabisa, nawe unanijua. 2Iwe ninaketi au ninainuka, unajua; hata ukiwa mbali unatambua ninachofikiri. 3Ninaposafiri na ninapolala, unayapepeta yote; kila njia ninayoipita unaijua vizuri. 4Neno bado halijafika ulimini mwangu, na tayari, Ee BWANA, unalijua lote. 5Umenizunguka nyuma na mbele; umeweka mkono wako juu yangu. 6Maarifa ya namna hii yamenizidi, ni ya ajabu mno; yako juu sana kiasi kwamba siwezi kuyafikia. 7Ningeweza kwenda wapi ili niepukane na Roho wako? Ningekimbilia wapi ili nijiepushe na uwepo wako? 8Nikipanda juu mbinguni, wewe uko huko; nikilala Kuzimu, wewe uko huko pia. 9Nikiruka juu ya mbawa za alfajiri na kwenda kuishi ng’ambo ya bahari iliyo mbali kabisa, 10huko pia mkono wako ungekuwa ukiniongoza, na mkono wako wa kulia ungenishika. 11Nikijiambia kwamba giza hakika litanimeza na nuru inayonizunguka itageuka kuwa usiku, 12hata giza halikufichi kitu; usiku unang’aa kama mchana, na giza na nuru ni sawa kwako. 13Ni wewe uliyeumba sehemu za ndani kabisa za nafsi yangu; uliufuma mwili wangu pamoja nilipokuwa bado tumboni mwa mama yangu. 14Ninakushukuru, kwa maana jinsi nilivyoumbwa ni ya kutia hofu na ya kustaajabisha. Unachokifanya ni cha ajabu, na ndani yangu ninalijua hilo vizuri. 15Hakuna hata mfupa wangu mmoja uliofichika kwako nilipokuwa nikiumbwa mahali pasipoonekana, nikitariziwa kama kazi nzuri ya mapambo ndani kabisa ya dunia. 16Macho yako yaliniona nilipokuwa bado sijaumbika; katika kitabu chako ziliandikwa zote, siku zilizoumbwa kwa ajili yangu, kila moja imewekwa mahali pake. 17Ee Mungu, jinsi ninavyozithamini fikira zako! Idadi yake ni kubwa mno! 18Nikijaribu kuzihesabu, zingezidi mchanga kwa wingi. Ninaamka, nami bado niko pamoja nawe. 19Ee Mungu, laiti ungewaua waovu! Enyi wauaji, ondokeni kwangu, 20wale wanaokutaja wanapopanga uovu wao; adui zako wanalitaja jina lako kwa uongo. 21Ee BWANA, ningewezaje kutowachukia wale wanaokuchukia, au kutowaona kuwa chukizo wale wanaokuinukia? 22Chuki yangu kwao ni kamili; wamekuwa adui zangu mwenyewe. 23Ee Mungu, unitazame ndani kabisa na uujue moyo wangu; unipime na uyajue mawazo yangu yasiyotulia. 24Uangalie uone kama niko katika njia inayoleta madhara, na uniongoze katika barabara isiyo na mwisho.