Zaburi 35

1Ya Daudi. BWANA, uwapinge wale wanaonipinga; upigane vita na wale wanaopigana vita dhidi yangu. 2Ushike ngao ndogo na ile kubwa, usimame unisaidie. 3Uchomoe mkuki na shoka la vita ukabiliane na wale wanaonifukuza; unijulishe kwa kusema, “Mimi ni wokovu wako.” 4Wale wanaowinda uhai wangu waaibishwe na kufedheheshwa; wale wanaopanga kunidhuru warudishwe nyuma wakiwa wamechanganyikiwa. 5Wawe kama makapi yanayopeperushwa na upepo, malaika wa BWANA akiwafukuza mbele yake. 6Njia yao iwe na giza na utelezi, malaika wa BWANA akiwawinda. 7Kwa maana bila sababu yoyote walinitegea wavu shimoni kwa siri; bila sababu walichimba shimo ili kuninasa. 8Maangamizi yawaangukie kabla hawajajua; wavu walioutega kwa siri uwanase wao wenyewe, nao waanguke ndani yake waangamie. 9Ndipo nafsi yangu yote itakapofurahi katika BWANA na kuusherehekea wokovu anaouleta. 10Kila mfupa wa mwili wangu utasema, “BWANA, je, yuko mtu aliye kama wewe? Wewe huwaokoa wanyonge kutoka kwa watu walio na nguvu kuliko wao, wanyonge na maskini kutoka kwa wale wanaowanyang’anya.” 11Mashahidi wakatili wanasimama dhidi yangu na kuniuliza mambo nisiyoyajua hata kidogo. 12Wananilipa madhara badala ya wema; nimebaki ukiwa, kama mtu aliyefiwa na mtoto. 13Lakini mimi, walipokuwa wagonjwa kitandani, nilivaa gunia; nilijinyenyekeza kwa kufunga, nami niliomba nikiwa nimeinamisha kichwa. 14Nilienenda kana kwamba ni kwa ajili ya rafiki au ndugu; niliinama, nimevaa nguo nyeusi za maombolezo, kama mtu anayemwombolezea mama yake. 15Lakini nilipojikwaa, walifurahi na kukusanyika pamoja; washambuliaji walikusanyika dhidi yangu bila mimi kujua; walinirarua wala hawakunyamaza. 16Kama wachekeshaji wasiomcha Mungu wanaodhihaki ili wapate tonge la chakula, walinisagia meno yao. 17Bwana, hata lini utasimama ukitazama tu? Unirudishe kutoka katika uharibifu wanaouleta; uuokoe uhai wangu mmoja pekee kutoka kwa simba. 18Nitakushukuru kusanyiko kubwa litakapokutana; nitakusifu kati ya umati wa watu. 19Usiwaache adui zangu waongo wanicheke kwa furaha; usiwaache wale wanaonichukia bure wakonyezane macho. 20Kwa maana hawazungumzi habari za amani; wanabuni uongo dhidi ya watu wanaoishi kwa utulivu katika nchi. 21Wananiachia vinywa vyao wazi na kusema, “Aha! Aha! Tumeona kwa macho yetu wenyewe!” 22Umeliona hilo, BWANA; usinyamaze. Bwana, usikae mbali nami. 23Amka! Jiinue unitendee haki; Mungu wangu na Bwana wangu, ulichukue shauri langu! 24BWANA Mungu wangu, unihukumu kama haki yako inavyotaka; wasinifurahie. 25Usiwaache waseme mioyoni mwao, “Aha! Tumepata tulichotaka!” Usiwaache waseme, “Tumemmeza mzima.” 26Wote wanaofurahia taabu yangu waaibishwe na kuchanganyikiwa pamoja; wale wanaojiinua juu yangu wavikwe aibu na fedheha. 27Wale wanaotaka kuniona nikithibitishwa kuwa sahihi wapige kelele za shangwe na kufurahi; waseme tena na tena, “BWANA ni mkuu! Hupendezwa mtumishi wake anapokuwa na amani.” 28Ndipo mchana kutwa nitakaposimulia jinsi ulivyo mwenye haki na kuziimba sifa zako.