Zaburi 45

1Moyo wangu umejaa wazo zuri; ninamtungia mfalme mashairi yangu, na ulimi wangu unakwenda kama kalamu ya mwandishi hodari. 2Wewe ni mzuri kuliko mtu yeyote; neema inatoka midomoni mwako; ndiyo sababu Mungu amekubariki milele. 3Jifunge upanga wako ubavuni mwako, ewe shujaa hodari, katika fahari yako na adhama yako! 4Katika adhama yako songa mbele kwa ushindi kwa ajili ya kweli, unyenyekevu na haki; mkono wako wa kuume na ukuonyeshe matendo ya kutisha. 5Mishale yako ni mikali; mataifa yanaanguka chini yako; inachoma mioyo ya adui za mfalme. 6Kiti chako cha enzi, Ee Mungu, kinadumu milele na milele; fimbo ya ufalme wako ni fimbo inayotawala kwa haki. 7Unapenda haki na kuchukia uovu; ndiyo sababu Mungu, Mungu wako, amekutia mafuta ya shangwe kuliko wenzi wako. 8Mavazi yako yote yananukia manemane, udi na kasia; sauti ya vinubi kutoka majumba yaliyopambwa kwa pembe za ndovu inakufurahisha. 9Binti za wafalme wamo miongoni mwa wanawake wa baraza lako; upande wako wa kuume anasimama malkia, amepambwa kwa dhahabu ya Ofiri. 10Nisikilize, binti, angalia na usikilize kwa makini: waache nyuma watu wako na nyumba ya baba yako, 11ndipo mfalme atakapoutamani uzuri wako. Yeye ni bwana wako; msujudie. 12Binti wa Tiro atakuja na zawadi; matajiri kuliko wote katika watu watajitahidi kupata kibali chako. 13Binti mfalme anasubiri ndani, amejaa fahari; gauni lake limefumwa kwa dhahabu. 14Akiwa amevaa mavazi yaliyotariziwa kwa rangi nyingi anaongozwa kwa mfalme, na wasichana wenzake wanamfuata, wakiletwa kwako. 15Kwa furaha na sherehe wanaingizwa, nao wanaingia katika jumba la mfalme. 16Mahali walipokuwa baba zako, watasimama wana wako; utawaweka kuwa wakuu katika nchi yote. 17Nitalifanya jina lako likumbukwe kizazi hata kizazi; kwa hiyo mataifa yatakushukuru daima.