Zaburi 143

1Zaburi ya Daudi. Ee BWANA, usikie maombi yangu; usikilize ninapokusihi unihurumie. Unijibu kwa uaminifu wako na kwa haki yako. 2Usimpeleke mtumishi wako hukumuni, kwa maana hakuna mtu aliye hai anayeweza kuonekana mwenye haki mbele yako. 3Adui amenisaka na kuyasaga maisha yangu mavumbini; ameniacha niishi mahali pa giza, kama watu waliokufa zamani sana. 4Roho yangu inazama ndani yangu, na moyo wangu umepigwa na bumbuazi ndani yangu. 5Ninazikumbuka siku zilizopita zamani; ninayafikiria yote uliyoyatenda na kutafakari kazi ya mikono yako. 6Ninakunyooshea mikono yangu; nafsi yangu yote inakungoja kama ardhi iliyochoshwa na ukame. Sela 7Ee BWANA, uharakishe kunijibu; roho yangu inazimia. Usiendelee kunificha uso wako, la sivyo nitakuwa mmoja wa wale wanaozama shimoni. 8Kila asubuhi unisikizishe habari za upendo wako usiokoma, kwa kuwa ni wewe ninayekutegemea. Unifundishe njia nipaswayo kuiendea, kwa maana nafsi yangu yote inakuelekea wewe. 9Uninyakue mikononi mwa adui zangu, Ee BWANA; nimejificha kwako. 10Unifundishe kutenda yanayokupendeza, kwa kuwa wewe ni Mungu wangu. Roho wako, aliye mwema, aniongoze katika ardhi tambarare. 11Ee BWANA, kwa heshima ya jina lako, unihifadhi hai; kwa haki yako unitoe katika dhiki yangu. 12Kwa upendo wako usiokoma utawakomesha adui zangu na kuwaangamiza wote wanaoyashambulia maisha yangu, kwa maana mimi ni mtumishi wako.