Zaburi 83

1Ee Mungu, usipumzike! Usinyamaze, wala usikae bila kufanya kitu, Ee Mungu! 2Tazama, adui zako wanafanya ghasia; wale wanaokuchukia wewe wanaviinua vichwa vyao juu. 3Wanapanga njama kwa hila dhidi ya watu wako na kufanya mashauri dhidi ya wale unaowathamini wewe. 4Wanasema, “Njooni, tuwafutilie mbali wasiwe taifa tena; mtu yeyote asilikumbuke tena jina la Israeli.” 5Wamekubaliana pamoja kwa nia moja; wanafanya mapatano dhidi yako, 6wakaao hemani wa Edomu, Waishmaeli, Moabu na Wahagri, 7Gebali, Amoni na Amaleki, Ufilisti na watu waishio Tiro. 8Hata Ashuru imejiunga nao; wanawapa nguvu zao wazao wa Lutu. Sela 9Uwatendee kama wewe ulivyowatendea Midiani, kama ulivyowatendea Sisera na Yabini kwenye bonde la Kishoni, 10walioangamizwa huko Endori na kuwa mbolea juu ya ardhi. 11Uwatendee wakuu wao kama ulivyowatendea Orebu na Zeebu, na watawala wao wote kama Zeba na Salmuna, 12waliosema, “Na tuyachukue malisho ya Mungu yawe yetu.” 13Ee Mungu wangu, uwafanye kama kichaka kikavu kinachozungushwa, kama makapi yanayopeperushwa na upepo. 14Kama moto unavyoteketeza msitu, kama miali inavyowasha moto milimani, 15ndivyo uwasake kwa dhoruba yako na kuwajaza hofu kwa kimbunga chako. 16Uzijaze nyuso zao fedheha, ili waje wakilitafuta jina lako, BWANA. 17Na waaibishwe na kutishwa siku zote; na wafedheheshwe na kuangamia, 18nao wapate kujua kwamba jina lako ni BWANA, kwamba wewe peke yako ndiwe Aliye Juu juu ya dunia yote.