Zaburi 16

1Mikitamu ya Daudi. Unihifadhi, Ee Mungu, kwa maana nimekufanya wewe kuwa kimbilio langu. 2Nafsi yangu, umemwambia BWANA, “Wewe ni Bwana wangu; mema yangu yanapatikana kwako peke yako.” 3Watu watakatifu wanaoishi katika nchi ndio wakuu kweli; wao ndio furaha yangu yote. 4Wale wanaomfuata mungu mwingine watapata huzuni juu ya huzuni. Sitamimina sadaka zao za damu, wala sitataja hata majina ya miungu yao. 5BWANA ndiye sehemu niliyopewa na kikombe ninachokinywea; ni wewe unayeilinda kura yangu iwe salama. 6Kamba za kupimia zimenipimia mahali pa kupendeza; kweli, nchi ninayoirithi inanifurahisha. 7Ninambariki BWANA, mshauri wangu; hata usiku ndani kabisa ya nafsi yangu ninaendelea kufundishwa. 8Nimemweka BWANA mbele yangu wakati wote; kwa kuwa yupo pale mkono wangu wa kuume, sitajikwaa kamwe. 9Ndiyo maana moyo wangu unafurahi na roho yangu inashangilia; mwili wangu pia utaishi kwa usalama. 10Kwa maana hutaniacha Kuzimu, wala hutamwacha mwaminifu wako aone shimo. 11Unanifundisha barabara inayoelekea uzimani; mbele yako kuna furaha kamili, na mkono wako wa kuume kuna raha zisizokwisha.