Zaburi 89

1Milele nitaimba juu ya upendo usiokoma ambao BWANA ameuonyesha; kizazi baada ya kizazi kinywa changu kitasimulia jinsi ulivyo mwaminifu. 2Kwa maana ninatangaza kwamba upendo usiokoma umejengwa udumu milele; umeuweka uaminifu wako imara mbinguni. 3“Nimefanya agano na yule niliyemchagua; nimemwapia Daudi, mtumishi wangu: 4‘Nitaufanya ukoo wako kuwa imara milele na kukifanya kiti chako cha enzi kisimame katika kila kizazi.’” Sela 5Mbingu zinakushukuru kwa maajabu yako, Ee BWANA, na kwa uaminifu wako katika mkutano wa watakatifu. 6Kwa maana ni nani katika mawingu ya juu aliye sawa na BWANA? Ni nani kati ya viumbe wa mbinguni aliye kama BWANA? 7Mungu anaheshimiwa kwa hofu kuu katika baraza la watakatifu, na anaogopwa kuliko wote wanaosimama kumzunguka. 8Ee BWANA Mungu wa majeshi, ni nani aliye na nguvu kama wewe, Ee BWANA? Uaminifu wako unakuzunguka kila upande. 9Wewe ni mtawala wa bahari yenye kiburi; mawimbi yake yanapoinuka, unayanyamazisha. 10Ulimponda Rahabu kama mtu aliyeuawa vitani; mkono wako wenye nguvu uliwakimbiza adui zako. 11Mbingu ni zako, na nchi nayo ni yako; uliweka misingi ya ulimwengu na kila kitu kilichomo. 12Kaskazini na kusini ni kazi ya mikono yako; Tabori na Hermoni hulia kwa furaha kwa jina lako. 13Mkono wako umejaa uweza; mkono wako una nguvu, na mkono wako wa kuume umeinuliwa juu. 14Kiti chako cha enzi kimesimama juu ya haki na hukumu; upendo usiokoma na uaminifu vinatembea mbele yako. 15Heri watu waliojifunza kupiga kelele za shangwe katika ibada; Ee BWANA, wanaishi katika nuru ya uwepo wako. 16Wanapata furaha katika jina lako mchana kutwa, na haki yako inawainua. 17Kwa maana wewe ndiwe fahari ya nguvu zao, na kwa wema wako nguvu yetu inainuliwa juu. 18Kwa maana ngao inayotulinda ni mali ya BWANA, na mfalme anayetutawala ni wa Mtakatifu wa Israeli. 19Zamani ulisema katika maono na watu wako waaminifu, ukasema, “Nimempa shujaa msaada; nimemwinua mtu niliyemchagua kutoka kati ya watu. 20Nilimpata Daudi, mtumishi wangu; nimemmiminia mafuta yangu matakatifu kumfanya mfalme, 21na mkono wangu utakaa pamoja naye, na mkono wangu utamfanya hodari. 22Hakuna adui atakayemshinda kwa hila, wala mtenda maovu hatamshusha chini. 23Nitawavunja watesi wake mbele ya macho yake na kuwaangusha wale wanaomchukia. 24Uaminifu wangu na upendo wangu usiokoma vitakaa pamoja naye, na kwa jina langu nguvu yake itainuka. 25Nitaiweka bahari chini ya mkono wake na mito chini ya mkono wake wa kuume. 26Ataniita, ‘Ni wewe uliye Baba yangu, Mungu wangu, mwamba wangu ambapo niko salama.’ 27Nitampa cheo cha mzaliwa wa kwanza, aliyeinuliwa juu ya kila mfalme duniani. 28Nitamdumishia upendo wangu usiokoma milele, na agano langu naye litasimama imara. 29Nitaufanya ukoo wake udumu siku zote, na kiti chake cha enzi muda wote anga litakapodumu. 30Ikiwa wazao wake watayaacha maelekezo yangu wasiishi kwa kufuata maamuzi yangu, 31ikiwa watazihesabu kanuni zangu kuwa si kitu wasizishike amri zangu, 32ndipo nitawahesabia uasi wao kwa fimbo na hatia yao kwa mapigo. 33Lakini upendo wangu usiokoma sitamwondolea kamwe, na uaminifu wangu hautakuwa wa uongo. 34Sitalinajisi agano langu kamwe; yale ambayo midomo yangu imesema sitayabadilisha. 35Nimeapa kwa utakatifu wangu, mara moja tu na kwa wakati wote, kwamba sitamwambia Daudi uongo kamwe: 36ukoo wake utadumu milele, na kiti chake cha enzi kitasimama mbele yangu kama jua, 37kitafanywa imara milele kama mwezi, yule shahidi mwaminifu aliye mawinguni.” Sela 38Lakini sasa umemtupa na kumkataa; umemkasirikia sana mfalme wako mpakwa mafuta. 39Umelikana agano ulilofanya na mtumishi wako; umeitupa taji yake mavumbini na kuinajisi. 40Umetoboa mianya katika kuta zake zote na kuziacha ngome zake kuwa kifusi. 41Kila apitaye njiani amemnyang’anya mali; jirani zake wanamdharau. 42Umeufanya mkono wa kuume wa watesi wake kuwa na nguvu na kuwajaza furaha adui zake wote. 43Naam, umeyafanya butu makali ya upanga wake ukamwacha asiweze kusimama vitani. 44Umeufanya utukufu wake ufifie na kukitupa kiti chake cha enzi mavumbini. 45Umezifanya siku za ujana wake kuwa fupi na kumvika fedheha kama joho. Sela 46Mpaka lini, Ee BWANA? Je, utaendelea kujificha milele? Je, hasira yako itaendelea kuwaka kama moto? 47Kumbuka jinsi maisha yangu yalivyo mafupi! Je, umemuumba kila mwanadamu bure? 48Ni nani awezaye kuendelea kuishi bila kuona kifo? Ni nani awezaye kujiokoa kutoka katika makucha ya Kuzimu? Sela 49Bwana, yako wapi matendo ya upendo usiokoma uliyoyaonyesha zamani, yale uliyomwapia Daudi kwa uaminifu wako? 50Bwana, ukumbuke dharau waliyorundikiwa watumishi wako; ninabeba ndani yangu matusi ya mataifa mengi yote, 51matusi ambayo adui zako wameyatupa, Ee BWANA, dhihaka zilizomfuata mfalme wako mpakwa mafuta kila hatua. 52BWANA na abarikiwe milele! Amina na amina.