Zaburi 48

1BWANA ni mkuu, anastahili sifa zote katika mji wa Mungu wetu, juu ya mlima wake mtakatifu. 2Mlima Sayuni umeinuka kwa uzuri, furaha ya dunia nzima; ndio vilele halisi vya Safoni, mji wa Mfalme mkuu. 3Ndani ya ngome za mji Mungu amejionyesha mwenyewe kuwa kimbilio la juu. 4Tazama: wafalme walikusanya majeshi yao, wakasonga mbele pamoja. 5Walitazama, wakapigwa na butwaa; wakaingiwa na hofu, wakakimbia. 6Huko walishikwa na kutetemeka, na maumivu kama ya mwanamke anayejifungua. 7Kwa upepo kutoka mashariki wewe unazivunjavunja merikebu za Tarshishi. 8Yale tuliyokuwa tumesikia, sasa tumeyaona kwa macho yetu katika mji wa BWANA wa majeshi, mji wa Mungu wetu: Mungu ataufanya usimame imara milele. Sela 9Ee Mungu, tumeutafakari upendo wako usiokoma hapa ndani ya hekalu lako. 10Sifa yako, Ee Mungu, inalingana na jina lako, na inaenea mpaka miisho ya dunia; mkono wako wa kuume umejaa haki tele. 11Mlima Sayuni na ufurahi, na miji ya Yuda ishangilie, kwa sababu unahukumu kwa haki. 12Tembeeni kuizunguka Sayuni, mpaka mwisho wa mzunguko; hesabuni minara yake, 13angalieni kwa makini kuta zake, tembeeni katika ngome zake, ili mweze kukieleza kizazi kijacho 14kwamba huyu ndiye Mungu, Mungu wetu milele na daima; yeye atakuwa kiongozi wetu mpaka tufe.