Zaburi 25

¹Kwako wewe, Ee Bwana, nainua nafsi yangu,

²ni wewe ninayekutumainia, Ee Mungu wangu. Usiniache niaibike, wala usiache adui zangu wakanishinda.

³Kamwe hakuna hata mmoja anayekutegemea atakayeaibishwa, bali wataaibishwa wafanyao hila bila sababu.

⁴Nionyeshe njia zako, Ee Bwana, nifundishe mapito yako,

⁵niongoze katika kweli yako na kunifundisha, kwa maana wewe ni Mungu Mwokozi wangu, nalo tumaini langu liko kwako wakati wote.

⁶Kumbuka, Ee Bwana, rehema zako kuu na upendo, kwa maana zimekuwepo tangu zamani.

⁷Usizikumbuke dhambi za ujana wangu wala njia zangu za uasi, sawasawa na upendo wako unikumbuke, kwa maana wewe ni mwema, Ee Bwana.

⁸Bwana ni mwema na mwenye adili, kwa hiyo huwafundisha wenye dhambi njia zake.

⁹Huwaongoza wanyenyekevu katika haki, naye huwafundisha njia yake.

¹⁰Njia zote za Bwana ni za upendo na uaminifu kwa wale wanaoshika shuhuda za agano lake.

¹¹Ee Bwana, kwa ajili ya jina lako, unisamehe uovu wangu, ijapokuwa ni mwingi.

¹²Ni nani basi, mtu yule anayemcha Bwana? Atamfundisha katika njia atakayoichagua kwa ajili yake.

¹³Mtu huyo atafanikiwa maishani mwake, nao wazao wake watairithi nchi.

¹⁴Siri ya Bwana iko kwa wale wamchao, yeye huwajulisha agano lake.

¹⁵Macho yangu humwelekea Bwana daima, kwa kuwa yeye peke yake ndiye ataitoa miguu yangu kutoka mtego.

¹⁶Nigeukie na unihurumie, kwa maana mimi ni mpweke na mwenye kuteseka.

¹⁷Shida za moyo wangu zimeongezeka, niokoe katika dhiki yangu.

¹⁸Uangalie mateso na shida zangu na uniondolee dhambi zangu zote.

¹⁹Tazama adui zangu walivyo wengi, pia uone jinsi wanavyonichukia vikali!

²⁰Uyalinde maisha yangu na uniokoe, usiniache niaibike, kwa maana nimekukimbilia wewe.

²¹Uadilifu na uaminifu vinilinde, kwa sababu tumaini langu ni kwako.

²²Ee Mungu, wakomboe Israeli, katika shida zao zote!