Zaburi 148

1Msifuni BWANA! Mbingu na zimsifu BWANA; vilele vya juu na vimpe sifa! 2Msifuni, enyi malaika wake wote! Enyi majeshi yote ya mbinguni, msifuni! 3Jua na mwezi, msifuni! Nyota zote zinazong’aa, msifuni! 4Msifuni, mbingu za juu kabisa, pamoja na maji yaliyo juu ya anga! 5Na walisifu jina la BWANA; kwa agizo lake walipata kuwako. 6Aliwaweka mahali pao milele na milele; aliwawekea sheria isiyopita. 7Kutoka duniani chini, msifuni BWANA, enyi majoka ya baharini na vilindi vyote vya maji, 8moto na mvua ya mawe, theluji na ukungu, pepo kali zinazofanya anachosema, 9milima na vilima vyote, miti izaayo matunda na mierezi yote, 10wanyama wa mwituni na ng’ombe wote, viumbe vitambaavyo na ndege warukao, 11wafalme wa dunia na mataifa yote, wakuu na watawala wote wa dunia, 12vijana wa kiume na wa kike pia, wazee pamoja na vijana! 13Na wote walisifu jina la BWANA, kwa kuwa jina lake peke yake limeinuliwa juu; utukufu wake unapita nchi na anga. 14Kwa ajili ya watu wake mwenyewe amewainulia pembe, sababu ya sifa kwa waaminifu wake wote, Waisraeli, watu walio karibu naye. Msifuni BWANA!