Zaburi 17

1Maombi ya Daudi. Sikia kesi ya haki, Ee BWANA; sikiliza kwa makini kilio changu. Utege sikio lako kwa maombi yangu, yanayotoka katika midomo isiyosema uongo. 2Hukumu yangu itoke kwako; macho yako yaone yaliyo ya haki. 3Umeujaribu moyo wangu na kunijia usiku; umenipitisha motoni ukaona hakuna kosa. Nimeamua kutotenda dhambi kwa kinywa changu. 4Wengine watende watakavyo, mimi nimeshika neno linalotoka midomoni mwako na kujiepusha na njia za wenye jeuri. 5Hatua zangu zimefuata nyayo zako; miguu yangu haijateleza kamwe. 6Ninakuita, kwa maana unanijibu, Ee Mungu; uinamishe sikio lako kwangu na usikilize ninayosema. 7Uonyeshe upendo wako usiokoma kwa njia ya ajabu, wewe unayewaokoa kwa mkono wako wa kuume wale wanaokimbilia kwako ili kujikinga na washambuliaji wao. 8Unilinde kama mtu anavyoilinda mboni ya jicho lake; unihifadhi chini ya kivuli cha mbawa zako, 9kutoka kwa waovu wanaonishambulia, kutoka kwa adui wanaotaka kuniua wanaonizingira. 10Wameifunga mioyo yao iliyonenepa kwa mafuta; vinywa vyao vinasema maneno ya kiburi. 11Sasa wanafuatilia hatua zetu na kutuzingira; macho yao yamekazwa kututupa chini, 12kama simba mwenye hamu ya kurarua mawindo yake, kama mwana-simba anayevizia pangoni mwake. 13Simama, Ee BWANA! Ukutane nao uso kwa uso na uwapigishe magoti. Uniokoe na waovu kwa upanga wako, 14kutoka kwa watu kama hao, Ee BWANA, kwa mkono wako, kutoka kwa watu wa dunia hii ambao fungu lao ni katika maisha haya tu. Unayajaza matumbo yao kwa yale uliyoyaweka akiba; watoto wao wana vingi, nao huwaachia wadogo wao kilichobaki. 15Lakini mimi, nikiwa katika haki, nitautazama uso wako; nitakapoamka, kukuona wewe kutakuwa ndicho ninachotamani tu.