Zaburi 109

1Kwa kiongozi wa kwaya. Ya Daudi. Zaburi. Ee Mungu ninayekusifu, usikae kimya. 2Kwa maana waovu wamefungua vinywa vya hila dhidi yangu; wanasema nami kwa ndimi za uongo. 3Wamenizingira kwa maneno ya chuki na kunishambulia bila sababu. 4Wanalipa upendo wangu kwa kunishtaki, lakini mimi naendelea kuomba. 5Wananilipa mabaya kwa mema niliyowatendea, na chuki badala ya upendo wangu. 6Mweke mtu mwovu awe juu yake; mshtaki na asimame upande wake wa kuume. 7Anaposhtakiwa, hukumu na iwe kwamba ana hatia, na hata maombi yake yahesabiwe kuwa dhambi. 8Maisha yake na yawe mafupi, na mtu mwingine achukue nafasi yake. 9Watoto wake na wapoteze baba yao, na mke wake abaki mjane. 10Watoto wake na wazunguke wakiomba-omba, wakitafuta chakula mbali na nyumba zao zilizobomoka. 11Mkopeshaji na anyakue vyote alivyo navyo, na wageni wachukue alichokifanyia kazi. 12Mtu yeyote asiendelee kumwonyesha upendo usiokoma, wala yeyote asiwahurumie watoto wake yatima. 13Ukoo wake na ukome, jina lao lifutwe ndani ya kizazi kimoja. 14BWANA na aukumbuke daima uovu wa babu zake, na dhambi ya mama yake isifutwe kamwe. 15Dhambi zao na zikae daima mbele za BWANA, naye afute kabisa kumbukumbu yao duniani. 16Kwa maana hakuwahi kufikiri kuonyesha upendo usiokoma; aliwawinda maskini na wahitaji na waliovunjika moyo mpaka kufa. 17Alipenda kulaani, na laana imemrudia; hakutaka kubariki, na baraka imekaa mbali naye. 18Alijivika laana kama nguo yake; ikapenya kama maji ndani ya utu wake wa ndani, ikaloweka kama mafuta mpaka ndani ya mifupa yake. 19Na iwe joho analojifunika, mshipi anaojifunga kila siku. 20Hivi ndivyo BWANA na awalipe washtaki wangu, wale wanaosema mabaya dhidi yangu. 21Lakini wewe, Ee Bwana MUNGU, unisimamie kwa heshima ya jina lako; uniokoe, kwa maana upendo wako usiokoma ni mwema. 22Kwa maana mimi ni maskini na mnyonge; moyo wangu ndani yangu umechomwa. 23Kama kivuli kinachorefuka jioni ninapita; nimepeperushwa mbali kama nzige. 24Magoti yangu yanalegea kwa kukaa bila chakula, na mwili wangu umekonda, hauna mafuta tena. 25Wananidharau; wanaponiona, wananitikisia vichwa vyao. 26Ee BWANA Mungu wangu, njoo unisaidie! Uniokoe, kama upendo wako usiokoma ulivyo. 27Uwafanye waone kwamba huu ni mkono wako unaofanya kazi, kwamba wewe, Ee BWANA, ndiwe uliyelitenda. 28Wao waweza kulaani, lakini wewe utabariki; wanaponiinukia wataaibika, lakini mtumishi wako atafurahi. 29Washtaki wangu na wavikwe fedheha na kujifunika aibu yao wenyewe kama joho. 30Midomo yangu itamshukuru BWANA tena na tena; nitamsifu katikati ya umati. 31Kwa maana husimama upande wa kuume wa mhitaji, ili awaokoe na wale ambao wangewahukumu kufa.