Zaburi 7

1Ee BWANA Mungu wangu, nimekufanya wewe kuwa kimbilio langu. Uniokoe kutoka kwa wote wanaoniwinda, na kunitoa mikononi mwao, 2la sivyo atanirarua kama simba, akinikokota bila mtu wa kuniokoa. 3Ee BWANA Mungu wangu, kama nimefanya wanayosema, kama mikono yangu ina hatia ya kosa, 4kama nimemlipa rafiki kwa madhara, au nimemnyang’anya adui yangu bila sababu, 5basi adui yangu anifukuze na kunikamata; ayakanyage maisha yangu ardhini na kuiacha heshima yangu ikiwa mavumbini. Sela 6Simama, Ee BWANA, katika hasira yako! Jiinue dhidi ya ghadhabu ya adui zangu. Amka unitendee; umeamuru haki itendeke. 7Watu wa mataifa wakusanyike kukuzunguka, nawe uketi tena kitini pako juu yao huko juu. 8BWANA anawahukumu watu wa mataifa. Unipe haki, Ee BWANA, kwa sababu niko sahihi na sijatenda kosa. 9Ukomeshe uovu wa waovu, na uwaimarishe wenye haki, kwa maana wewe ndiwe Mungu mwenye haki unayepima mawazo na mioyo. 10Ngao yangu ni Mungu, anayewaokoa wale wenye mioyo minyofu. 11Mungu ni mwamuzi mwenye haki, Mungu anayekasirikia uovu kila siku. 12Mtu yeyote asipogeuka, Mungu atanoa upanga wake; amefunga uzi wa upinde wake na kulenga. 13Ameandaa silaha za kuua kwa ajili ya mtu huyo, na anaigeuza mishale yake kuwa moto. 14Tazama jinsi mtu mwovu alivyo na mimba ya uovu: akiisha kuchukua mimba ya taabu, anazaa uongo. 15Alichimba shimo na kulifukua kwa kina, akaanguka katika shimo lile lile alilolifanya. 16Taabu aliyoisababisha inamrudia kichwani pake mwenyewe; ukatili wake unaanguka juu ya utosi wake mwenyewe. 17Nitamshukuru BWANA kwa sababu anatenda yaliyo haki, nami nitaliimbia sifa jina la BWANA Aliye Juu Kabisa.