Zaburi 71

1BWANA, nimekufanya wewe kuwa kimbilio langu; usiniache niaibishwe kamwe. 2Kwa kuwa wewe ni mwenye haki, uniponye na kuniweka huru; uiname kunisikiliza, uniokoe. 3Uwe mwamba ninaoweza kukaa ndani yake, mahali ninapoweza kuja daima. Umetoa amri ya kuniokoa, kwa kuwa wewe mwenyewe ndiwe genge langu na ngome yangu. 4Ee Mungu wangu, unitoe katika makucha ya waovu, katika mshiko wa wadhalimu na wakatili. 5Kwa maana wewe ndiwe tumaini langu, Bwana MUNGU; nimekutumaini tangu nilipokuwa kijana. 6Nimekutegemea wewe tangu kuzaliwa; ni wewe uliyenitoa katika mwili wa mama yangu. Nitakusifu bila kukoma. 7Kwa wengi nimekuwa ishara inayowashangaza, lakini wewe ndiwe kimbilio langu lenye nguvu. 8Kinywa changu kimejaa sifa zako; mchana kutwa nanena juu ya utukufu wako. 9Usinitupe kando sasa kwa kuwa nimezeeka; usiniache nguvu zangu zinapoisha. 10Kwa maana adui zangu wanazungumza juu yangu; wale wanaongoja kuutoa uhai wangu wanapanga njama pamoja, 11nao wanasema, “Mungu amemwacha. Mfuateni mkamshike, kwa maana hakuna atakayemwokoa.” 12Ee Mungu, usikae mbali nami; Ee Mungu wangu, uje upesi unisaidie! 13Washtaki wangu na waaibishwe na kufanywa si kitu; wanaotaka kunidhuru na wafunikwe dharau na aibu. 14Lakini mimi sitaacha kamwe kutumaini; nitaongeza sifa zako tena na tena. 15Kinywa changu kitasimulia haki yako na msaada wako wa kuokoa mchana kutwa, ingawa ni mwingi kuliko ninavyoweza kuhesabu. 16Nitakuja kusimulia matendo makuu ya Bwana MUNGU; nitaikumbuka haki yako, yako wala si ya mwingine. 17Ee Mungu, wewe umekuwa ukinifundisha tangu nilipokuwa kijana, nami bado ninasimulia maajabu yako. 18Sasa kwa kuwa nimezeeka na kuwa na mvi, Ee Mungu, usiniache, mpaka nimekiambia kizazi kinachonifuata yale mkono wako uliyoyatenda, na kuwajulisha uweza wako wote ambao bado hawajazaliwa. 19Ee Mungu, haki yako inapanda juu hata mbinguni; wewe umetenda mambo makuu. Ee Mungu, ni nani aliye kama wewe? 20Umenifanya nione taabu nyingi na nyakati ngumu, lakini wewe utanirudishia uhai, na kunipandisha tena kutoka vilindi vya nchi. 21Unifanye mkuu kuliko hapo awali, na unigeukie kunifariji tena. 22Nami kwa upande wangu nitakushukuru kwa muziki wa kinubi; Ee Mungu wangu, nitausifu uaminifu wako. Kwa zeze nitakupigia wewe, Ee Mtakatifu wa Israeli. 23Midomo yangu itavuma kwa furaha ninapoimba sifa zako, na vivyo hivyo nafsi yangu yote, ambayo wewe umeiweka huru. 24Mchana kutwa ulimi wangu utanena juu ya haki yako, kwa maana watu waliotafuta kunidhuru wameaibika na kunyenyekezwa.