Zaburi 31

1BWANA, nimekufanya wewe kuwa kimbilio langu; usiniache niaibishwe kamwe; kwa kuwa wewe ni mwenye haki, uniweke huru. 2Uiname unisikilize; harakisha kuniokoa. Uwe mwamba ninaoweza kujificha kwake, nyumba yenye ngome inayonilinda salama. 3Wewe mwenyewe ni mwamba wangu na ngome yangu; kwa heshima ya jina lako utaniongoza na kunionyesha njia. 4Utaniweka huru kutoka katika wavu walionitegea kwa siri, kwa sababu wewe ni ngome yangu. 5Ninaiweka roho yangu mkononi mwako uitunze; umenikomboa, BWANA, Mungu aliye mwaminifu. 6Ninawachukia wale wanaojitoa kwa sanamu zisizofaa kitu; lakini tumaini langu liko kwa BWANA. 7Nitajawa na furaha na shangwe kwa sababu ya upendo wako usiokoma, kwa maana uliona jinsi nilivyoteseka, ukazijali taabu nilizokuwa nazo. 8Hukuniachilia katika nguvu za adui yangu; umeiweka miguu yangu mahali palipo wazi na pana. 9Unihurumie, BWANA, kwa maana niko taabuni; huzuni imeyachosha macho yangu, nafsi yangu yote, mwili wangu. 10Huzuni inayamaliza maisha yangu, na kuugua kunamaliza miaka yangu; hatia yangu imezifanya nguvu zangu ziishe, na mifupa yangu inadhoofika. 11Adui zangu wote wamenifanya kuwa aibu, hasa kwa jirani zangu; watu ninaowajua wananiogopa, na wanaponiona nje hunikimbia. 12Watu wameniondoa mawazoni mwao kana kwamba nimekufa; mimi ni kama chungu kilichovunjwa. 13Ninawasikia watu wengi wakinong’ona uongo — hofu kila mahali! — wanapopanga pamoja juu yangu, wakifanya hila ya kuniua. 14Lakini mimi ninakutumaini wewe, BWANA; ninakuambia, “Wewe peke yako ndiwe Mungu wangu.” 15Maisha yangu yote, kila kipindi chake, yamo mkononi mwako; uniokoe kutoka katika nguvu za adui zangu na kutoka kwa wale wanaonifukuza. 16Uelekeze nuru ya uso wako kwa mtumishi wako; kwa upendo wako usiokoma, uniokoe. 17BWANA, usiniache niaibishwe, kwa maana nimekulilia; aibu iwaangukie waovu; walale kimya Kuzimu. 18Midomo inayosema uongo ifanywe bubu, midomo inayomsema mwenye haki kwa jeuri, kwa kiburi na dharau. 19Jinsi ulivyo mkuu wema unaowawekea akiba wale wanaokucha, wema unaowatendea, mbele ya macho ya watu wote, wale wanaokufanya kuwa kimbilio lao! 20Unawaficha chini ya kifuniko cha uwepo wako, mbali na hila za wanadamu; unawaweka katika kibanda, salama mbali na ndimi za ugomvi. 21BWANA abarikiwe, kwa kuwa amenitendea ajabu ya upendo usiokoma nilipokuwa katika mji uliozingirwa na adui. 22Katika hofu yangu nilisema, “Nimekatiliwa mbali, siko tena mbele ya macho yako.” Hata hivyo ulisikia sauti yangu nilipokusihi unihurumie na kukulilia. 23Mpendeni BWANA, ninyi nyote mlio waaminifu kwake! BWANA huwalinda wale wanaoshika uaminifu, lakini mtu atendaye kwa kiburi humlipa kwa kipimo kamili. 24Simameni imara na muwe na mioyo shujaa, ninyi nyote mnaoweka tumaini lenu kwa BWANA.