Zaburi 57

1Nionyeshe neema, Ee Mungu, nionyeshe neema, kwa maana nimekufanya wewe kuwa kimbilio langu; nitajisitiri chini ya kivuli cha mbawa zako mpaka wakati wa maangamizi upite. 2Ninamwita Mungu Aliye Juu Kabisa, Mungu anayetimiza mpango wake kwa ajili yangu. 3Atanyosha mkono kutoka mbinguni na kuniokoa, na kumwaibisha yule anayeniwinda; Mungu ataupeleka upendo wake usiokoma na uaminifu wake. Sela 4Nimezungukwa na simba; lazima nilale kati ya watu wanaorarua kama wanyama wakali. Meno yao ni ncha za mikuki na mishale, ndimi zao ni upanga ulionolewa. 5Ee Mungu, uinuliwe juu ya mbingu; utukufu wako na uenee juu ya dunia yote. 6Waliweka wavu njiani mwangu, nami nikazama katika huzuni; walichimba shimo mbele yangu, nao wenyewe wakaanguka ndani yake. Sela 7Moyo wangu ni imara, Ee Mungu, moyo wangu ni imara; nitaimba na kupiga nyimbo za sifa. 8Inuka, nafsi yangu! Amkeni, kinubi na kinanda! Nitayaamsha mapambazuko. 9Ee Bwana, nitakushukuru wewe mbele ya mataifa yote; nitaziimba sifa zako katika kila taifa. 10Kwa maana upendo wako usiokoma unapanda juu mpaka mbinguni, na uaminifu wako unafika mpaka mawinguni. 11Ee Mungu, uinuliwe juu ya mbingu; utukufu wako na uenee juu ya dunia yote.