Zaburi 21

¹Ee Bwana, mfalme huzifurahia nguvu zako. Tazama jinsi ilivyo kuu furaha yake kwa ushindi unaompa!

²Umempa haja ya moyo wake na hukumzuilia maombi ya midomo yake.

³Ulimkaribisha kwa baraka tele na kumvika taji ya dhahabu safi kichwani pake.

⁴Alikuomba maisha, nawe ukampa, wingi wa siku milele na milele.

⁵Kutokana na ushindi uliompa, utukufu wake ni mkubwa, umeweka juu yake fahari na utukufu.

⁶Hakika umempa baraka za milele, umemfanya awe na furaha kwa shangwe ya uwepo wako.

⁷Kwa kuwa mfalme anamtumaini Bwana; kwa upendo usiokoma wa Aliye Juu Sana hatatikiswa.

⁸Mkono wako utawashika adui zako wote, mkono wako wa kuume utawakamata adui zako.

⁹Wakati utakapojitokeza utawafanya kama tanuru ya moto. Katika ghadhabu yake Bwana atawameza, moto wake utawateketeza.

¹⁰Utawaangamiza wazao wao kutoka duniani, uzao wao kutoka wanadamu.

¹¹Ingawa watapanga mabaya dhidi yako na kutunga hila, hawawezi kufanikiwa,

¹²kwa kuwa utawafanya wakimbie utakapowalenga usoni pao kwa mshale kutoka kwenye upinde wako.

¹³Ee Bwana, utukuzwe katika nguvu zako, tutaimba na kusifu nguvu zako.